Shillong, Jymmang 14
Ki pulit ka Ri Bhoi lyngba u Additional Superintendent of Police, u Bah Banraplang Jyrwa, ha ka Sngi Ba-Ar ki la ïathuh ba ka jingkhlad noh jong u Bah Kyrmen Lyngdoh Nonglait ha ka shnong Erpakon ka dei namar ka jingshah tied da u dieng ha uwei u bar jylla uba trei ha ka dukan die ja ïa uba la tip kyrteng kum u Raju Rajbhar, 43 snem ka rta na Assam.
Ha u kyrwoh khubor u Bah Banraplang u la ong ba ha ka 12 tarik Jymmang ki pulit ki la ïoh pdiang ïa kawei ka ejahar na ka kurim jong u Bah Kyrmen ha kaba la pyntip ba u kurim jong ka u la khlad na ka jingmynsaw jur bad ka la suba ba u la shah pynïap. Ïa ka met jong u Bah Kyrmen la lap narud surok ha ka shnong Erpakon ha ka 11 tarik Jymmang da ki nongshong shnong ha ka por kumba 8 baje mynmiet.
Ha katei ka miet hi ki pulit ka thanat Nongpoh ki la leit sha katei ka jaka ba lap ïa ka metïap bad ki la ïakren bad ki briew kiba la sakhi ïa kaei kaba la jia.
Ki pulit ki la ong ba kita ki sakhi ki la pyntip ba u don uwei u briew uba ki suba ïa uba la tip kyrteng kum u Raju uba trei ha R.N. Sharma Hotel ha Erpakon. La ong ba la ïohi khatduh ïa u Raju bad u Bah Kyrmen ba ki la don hapdeng ka jingïania.
Na ka liang ki pulit ki la kem noh ïa u Raju bad ki la wanlam sha thanat Nongpoh ban tohkit.
Nalorkata, ki pulit ki la ïathuh ba na ka liang u Raju u la kam ba ha ka 11 tarik Jymmang ha ka por kumba 7:30 janmiet ma u bad utei u rangbah uba la khlad ki la ïania. Ha kane ka jingïania, la ong ba u Raju u la bom da u dieng ïa u Bah Kyrmen. Bad hadien Kata u Raju u la phet krad na katei ka jaka hynrei u la shah kem noh ha ki pulit. Nalorkata, la kynnoh ba kine baroh ar ngut ki la don hapdeng ka jingshoh u khawiang.
Na ka liang ki pulit ki la pynrung da ka mukotduma ha thanat Nongpoh pyrshah ïa u Raju hapoh ka kyndon 302 IPC bad ka jingtohkit ka dang bteng.
