Nongstoiñ, Jymmang 14
Uwei u samla uba na ka thaiñ Nongstoiñ u bym shym la kwah ban pynpaw kyrteng ne pyni durkhmat u la pynpaw ïa ka jingsngewsih kaba jur halor ka jingbym shim khia bad bym kheiñ snep jong ki nongtrei Technician kiba dei peit ïa ka x-ray bad kiwei hapoh ka Civil Hospital Nongstoiñ ïa la ka kam haba wan ki jingjia ba kyrkieh hapoh hospital.
Katkum ka jingïathuh jong utei u samla, la ong ba katei ka jingjia ka la jia ha ka 12 tarik mynta u bnai kaba dei ka Sngi U Blei. U la ïathuh ba hadien ba u la ïakynduh ïa ka jingjia aksiden kali ha ka surok bah Nongstoiñ-Riangdo bad haba la pynkit noh mar-mar ïa u sha Civil Hospital Nongstoiñ bad u la ong ruh ba na ka liang jong ki doktor ki la ïaleh shitom ban ai jingsumar ba kyrkieh ïa u, hynrei kaba sngewsih ka long ba ha katei ka sngi ki nongtrei kiba dei peit ïa ki kor x-ray ki khlem don hapoh ka hospital. Kumta na ka liang jong ki doktor ki la phone ban phah wan ïa ki nongtrei hynrei naduh ka por 1 baje janmiet haduh ka por 4 baje janmiet ki khlem poi satia.
Shuh shuh u la ïathuh ba namar katei ka jingleh jong kitei ki nongtrei, na ka liang jong ki doktor ki la phah noh ïa utei u samla sha Shillong ban ïoh ka jingsumar kaba biang.
Utei u samla u la ong shuh shuh ba lada um shim ïa ka rai kaba kyrkieh ban wan kiew wut-wut sha Shillong bad ban leit sha NEIGRIHMS um tip shuh kaei ka ban jia ïa u. Nalor kata, u la ong ruh ba kan jia aïu lada ki duk ki suk ki bym kot bor ban leit phah sumar sha ki jaka sumar ha Shillong lada kiba kum kitei ki jingjia ki ïai jia hapoh Civil Hospital Nongstoiñ.
Namar kata, u la kyntu ruh ïa ki bor ba halor jong ka Civil Hospital Nongstoiñ ba kin shim khia bad leh eiei ïa kiba kum kitei ki nongtrei khnang ban lait na kino-kino ki jingjia kiba sngewsih ïa ki briew bad nongpang khamtam ïa ki duk ki suk.
