Shillong, Jymmang 14
Da ki phew tylli ki narphna (diengphna) ba la shna da ki nar bad pynïeng ha u lum jingtep ka Balang Katholik kaba don ha Tura, ki la shah jynrat ha ka kynhun jong ki runar bym lah ban tip ki dei kiei.
Kane ka lum jingtep kaba la shah jynrat ki narphna ka dei jong ka Cathedral Parish kaba don ha RC Road, Tura bad kaba don marjan bad ka ïing jong u Bishop.
Ha kane ka jingjia, ki runar ki la ïoh ban rah haduh 19 tylli ki narphna, katba 15 tylli pat la shu pynjulor noh namar ka jingbym shym lah ban jynrat satia.
Kane ka jinghiar ban jynrat ïa ki narphna ka dei beit tang ban ïoh leit die ïa ki nar namar katkum ba la paw, kine ki runar kim shym la ktah satia pat ïa ki diengphna ba la shna da ka lyntang.
Ha kaba ïadei bad kane, ki pulit ki la ïathuh ba ki la ïoh pdiang ïa ka ejahar bad ha kaba ki la hiar ruh ban pynlong ïa ka jingtohkit ban lapdien ïa ki runar kiba la leh ïa kane ka kam.
La ong ruh ba ha kane ka jingtohkit, ki pulit ki la ïoh ban kurup noh ïa 8 tylli ki narphna na ka jaka pyllang tiar jot kaba don ha Chandmari, Tura. Na ka liang jong ki briew kiba trei ha kane ka jaka ki la pyntip ba arngut ki samla shynrang ki la wan da ka ‘auto rickshaw’ bad pyntip ba ki la weng noh ïa kine ki narphna barim ban bujli da kiba thymmai.
La ong ruh ba kine ki runar ki la die ïa kine ki narphna ha ka dor kaba long 2,200 tyngka.
