New Delhi, Jymmang 14
U Myntri Rangbahduh ka ri, u Narendra Modi u don ïa ki jingdon-jingem kiba shong dor palat T. 3 klur, hynrei um don jaka, ïing ne kali, la ong ha ka ‘affidavit’ ilekshon jong u. U Myntri Rangbahduh ka ri u la thep kyrteng na Varanasi konstitwensi ha ka Sngi Ba-ar.
Ha ka ‘affidavit’, u Modi u la pynbna ïa ki jingdon-jingem kiba shong dor T. 3.02 klur, kaba bun ka dei kaba kynthup ïa ka ‘fixed deposit’ kaba T. 2.86 klur bad ka State Bank of India. Ka pisa kaba u don ha kti ka long T. 52,920 bad u don T.80,304 ha 2 tylli ki ‘bank account’ ha Gandhinagar bad Varanasi.
U Myntri Rangbahduh u don T. 9.12 lak kum ka jingkynshew ha ka National Savings Certificates bad don ruh ïa 4 tylli ki sati ksiar kiba shong dor T. 2.68 lak. Ka tulop jong u ka la kiew sha ka T. 23.56 lak ha u 2022-23 na ka T. 11.14 lak ha u 2018-19.
Ha ka pule-puthi, u Myntri Rangbahduh u la pynbna ba u la pyndep ïa ka Bachelor of Arts na Delhi University ha u snem 1978 bad ïa ka Master of Arts na Gujarat University ha u snem 1983. U la ong ruh ba um don kino-kino ki dak saw ha ka liang ki kam be-aiñ kiba sahteng pyrshah ïa u.
Hashuwa, haba thep kyrteng na Varanasi konstitwensi, ha kaba u khmih lynti ban wanphai biang ha ka sien kaba 3 kum u MP, u Myntri Rangbahduh u la ong, “Nga da sngew ktah bad sngew myllung. Ngam shym la sngewthuh kumno ki 10 snem ki la ïaid hapoh ka jingda jong ka jingieid jong phi. ‘Aaj Maa Ganga ne mujhe god le liya hai’ (Mynta, ka Maa Ganga ka la ting ïa nga).”
Ka Varanasi kan thep ‘vote’ ha ka kylla ba 7 jong ka ilekshon sha ka Lok Sabha – 1 tarik u Jylliew.
