Jowai, Jymmang:
Ka Trained Nurses Association of India (TNAI) West Jaiñtia Hills Unit ha ka 13 tarik Jymmang ka la rakhe ïa ka International Nurses Day kum ka dak ban kynmaw burom ïa ka lyngkhuh sngi kha jong ka Florence Nightingale’s kaba dei ka nongmait lynti ban long kum ka nongshem bad ka nongsumar ïa ki nongpang.
Ïa ka jingïalang kaba la long ha Bishops House Lumbihsyntu, Mihmyntdu, West Jaiñtia Hills District la sdang da ka jingthang ïa ka sharak da u kongsan u Bah Ferdinand B Basan, Additional Deputy Commissioner, West Jaiñtia Hills.
U Dr. N Nongtdu, Woodland WK Hospital, Sabahmuswang, West Jaiñtia Hills District u la long kum u symbud kongsan ha ka jingdonlang ka Kong I Kharduit, Assistant Director of Nursing, President TNAI State Branch.
Ka phang jong ka International Nurses Day ka long “Our Nurse. Our Future. The economic power of care” ka kren shaphang ki kam ba la leh da ki nos ban pynïoh ïa ka jingkoit jingkhiah bad ka jingïarap lyngba ka jingtrei shitom jong ki.
U Bah FB Basan ha ka jingkren u la pyrto ïa ka jingtrei shitom jong ki nos na ka bynta ka imlang sahlang bad u la kyntu ruh ban bteng shuh shuh ïa ki kam babha jong ki.
U Dr. N Nongtdu u la pynsngew ïa ka jingshem shimet jong u halor ka jingtrei shitom jong ki nos ha ka por ba u don ha ka jingthiah pang.
Kiwei kiba la ai jingkren ki long ka Kong Meba-ai Talang, Nursing Tutor, Dr. Norman Tunnel Hospital, Jowai, kaba la batai halor ka phang “Our Nurse. Our Future. The economic power of care”, ka Kong I Kharduit, Assistant Director of Nursing, President TNAI State Branch ha ka jingdonlang ka Dr. A Paswet, Medical Superintendent, Jowai Civil hospital, Ialong, Dr. War, Medical Superintendent, MCH, Panaliar nalor kiwei.
Kum ka dak ban ithuh ïa u synñiang u bynhei ba ki la shakri na ka bynta ka imlang sahlang, na ka liang ka Nurse Association ka la ai mementos sha ki nos kiba la shongthait.
