Shillong, Jymmang 14
Hadien ba ka jingbuhthong ban pynpoi umkor lut sha man la ki ïing lyngba ka skhim Jal Jeevan Mission (JJM) hapoh u Lber 2024 kam shym la urlong ha Meghalaya bad ha kiwei ki bynta jong ka ri India, ka Sorkar Jylla mynta ka khmih lynti ba la kumno-kumno yn sa lah ban pynurlong ha u Nailar mynta u snem namar sa 23% ka dang sah ban pyndep ïa kane ka skhim.
Ha kane ka Jylla, ka jingpyntrei ïa ka skhim JJM mynta ka kot sha ka 77.38 na ka 100; kaba mut ba la pyndep ban buh ïa ki kor um ha phyllaw ïing ban pynpoi um sha kumba 5 lak, 4 hajar, 21 tylli ki longïing haduh mynta.
La ong ba ka Sorkar ka la buhthong ban pyndep ïa ka JJM skhim kaba dang sah ha u Nailar mynta u snem.
U Myntri ka tnat PHE u la kubur ba ka don ka jingslem ban pyndep namar ki don ki daw kum ka jingmih jingeh ha ka liang ka jaka nalor ka jingbym pat sdang ki kontraktor ban pyntrei ïa ka skhim bad ki don pat ki kontraktor kiba la iehnoh.
Hynrei u la ong ba la bthah ïa ka tnat PHE ba kan ai jingtip sha baroh ki kontraktor kiba ïoh kam ba kin sdang noh ban pyntrei bad lada kim lah ban sdang, dei ban thaw lad ban aiti thymmai ïa ka kam shawei pat.
Baroh shikatta, ka don ruh ka jingkynnoh ba ka don ka jingbym biang ha ka rukom pyntrei ïa ka skhim JJM ha Meghalaya namar ki don ki jaka ba la dep teh ïa ki pipe bad kor um ha phyllaw ïing briew hynrei ka um pat kam poi satia da kaba kynnoh bamsap haba pyntrei ïa kane ka skhim.
Na ka liang u Myntri ka tnat PHE u la ong ba ban shu kynnoh bamsap kyllum lut ïa baroh ki projek ba pyntrei lyngba ka skhim JJM ka long kaba lah pdiang namar lada don kano kano ka jingbym biang bad leh bakla, dei ban kdew ne ujor tang ïa kata ka projek ka bym biang ha ka rukom pyntrei.
U Marak kum u Myntri u la ong ba ka jingpyntrei ïa ka JJM ka long haba khuid haba shai bad ka jingsiew ïa ka pisa ruh ka long kaba khuid namar la leh hadien ba dep ban khmih bniah da ka kynhun Third Party.
U la ong ym lah ban shu kynnoh lut ïa baroh ki projek JJM ba ki dei kiba bamsap hynrei dei ban pyni tang kata kaba don ka jingbym biang ha ka rukom pyntrei.
