Shillong, Jymmang 14
Ki nongshong shnong jong ka shnong Mynriang kaba hap hapoh ka Mawryngkneng Block, East Khasi Hills District kaba don mar khap bad ka Ri Bhoi District bad West Jaiñtia ki la pynpaw ka jingbynñiaw halor ka jingduh noh ïa ka jingkieng ïaid kjat kaba kyrteng ka jingkieng Umtung kaba dei kawei na ka jingkieng kaba la rim bha kaba pynïasoh sha Ri Bhoi District sha Thadrang Khyndewso Mawlansnai Bhoirymbong bad sha West Jaiñtia.
Ki nongshong shnong ki ju pyndonkam ïa kane ka jingkieng haba leit ïew leit hat kum sha Mawlansnai bad kiwei ki bynta jong ka Ri Bhoi District kumjuh ruh ki nongrep kiba don jaka rep sha Ri Bhoi kum ki pynthor kba bad kiwei kiwei ki mar rep.
Ka jingduh noh jong kane ka jingkieng Umtung ka la long ka jingduh kaba khraw ïa ki nongshong shnong kiba ju pyndonkam bad ka la buh jingeh ruh khamtam ha ka por rep kba kaba dei ka por jur slap.
Na ka liang ka shnong ka la phah la bun tylli ki jingthoh sha ka Sorkar ban thaw lad bad ai jingïarap ban ïoh pynbha ïa kane ka jing kieng hynrei haduh mynta kim ïoh pdiang kano-kano ka jubab bad ka jingïarap na ka Sorkar.
Kumta u Bah J. J. Lyngkhoi uba dei u Secretary Shnong Mynriang u la kyntu ïa ki bor ka Sorkar ba kan thaw ki lad ki lynti ban ïoh pynbha ïa kane ka jingkieng khamtam mynta ka la dei ka por lyiur ka la buh jingeh ïa ki nongrep namar ki lah ban kam sha shilang ka wah.
U la ong ba kane ka jingkieng Umtung kumba long mynta la sah satang ki nar ym don eiei shuh. Kumta ki nongrep ha ka por lyiur ki hap ban snoh najrong ki nar bad kane ka buh jingeh ïa ki bad jingma ïa ka ïaid ka ïeng namar ym don lynti na kawei pat.
U Bah Lyngkhoi u la ïathuh ba ka jingïarap ba khatduh ban maramot ïa kane ka jingkieng ka dei ha u snem 2013 ha ka por ba long MLA u Bah David A Nongrum (ba la khlad) ha ka jinglut T. 50,000 bad la shu siang da ki lyntang.
Namar kata, na ka liang u Bah Lyngkhoi u kyntu bad kyrpad ïa ki nongmihkhmat ba kin phai khmat lem sha ka shnong Mynriang ba kin lah ban pynbha ïa kane ka jingkieng Umtung.
Na ka liang ka shnong Mynriang ka la buh jingthoh ruh ha u CEM ka KHADC ban pan jingïarap ban pynïoh kino-kino ki skhim khnang ban ïoh pynbha ïa kane ka jingkieng.
