Shillong Jymmang 14
U Symbud Myntri Rangbah ka Jylla, Bah Sniawbhalang Dhar uba khmih ruh ïa ka tnat Pynroi Sor, u la pyntip ba ka Sorkar kan sa pynkynriah noh ïa ki nongshong dukan madan ban pynwandur bad pynkylluid ïa ki lynti ïaid ha sor Shillong.
Haba kren sha ki lad pathai khubor ha ka Sngi Ba-ar, u Symbud Myntri Rangbah u la ong ba ka Sorkar wat la ka la dep ban ithuh ïa ki katto-katne ki jaka ban pynkynriah hynrei haduh mynta kam pat shim rai satia.
“Ka Sorkar ka la dep ban ithuh ïa ki katto-katne tylli ki jaka ha nongbah Shillong ban pynkynriah noh ïa kiba shong dukan madan kiba don kumba 200 haduh 300 ngut kiba shong die jingdie ha Khyndailad, Motphran bad ha Laitumkhrah,” la ong u Bah Sniawbhalang.
U la ong, na ka liang ka tnat ka la dep ban ithuh ïa lai bad saw tylli ki jaka ban ïoh pynwandur khnang ba yn lah ban pynkynriah ïa ki nongshong dukan madan ym tang na Khyndailad hynrei na Motphran bad Laitumkhrah ruh kumjuh.
“Na ka liang jong ka tnat Pynroi Sor, ngi la dep ban peit ïa ki jaka ha ki jaka pynïeng kali jong ka MUDA hynrei ïa mynta hi ngim pat shim satia ïa ka rai ha kano ka jaka ban pynkynriah ïa ki nongshong dukan madan kiba la dep ithuh da ka Sorkar,” la ong u Bah Sniawbhalang.
Haba kubur halor ka jingpyntip u Myntri ka tnat Kam Jngohkai ba ka Sorkar kan pynkynriah ïa ki dukan die madan na Khyndailad hapoh ka taïew pdeng jong u Jylliew, u Bah Sniawbhalang u la ong wat la ka sorkar ka dang pyrshang hynrei kane ka kam imat kan dang kham shimpor sa katto-katne bnai namar kiba bun ki kam ba hap leh.
U la ong ba kane ka jingthmu ka Sorkar ka dei shibynta na ka bynta ban wanrah ïa ka jingkylluid ki lynti syngkien bad ka jingpynitynnad ïa ka sor Shillong.
