Shillong, Jymmang 16
Ka tnad pule-puthi ka Sorkar Jylla ka la thaw ïa ka komiti ba kynthup ïa 3 ngut ki dkhot ban tohkit halor ka jingkynnoh aiti ïa ki kot ki sla ba thok da katto-katne ngut ki kyrtong ha ki skul Sorkar L.P. ba hap hapoh Dadenggre Sub-Division.
“Haba ïadei bad ki jingkynnoh na ki nongujor halor ka jingkynnoh aiti ïa ki kot ki sla bad syrnot thok da katto-katne ngut ki kyrtong kiba la seisoh ha ka jingthung kam Assistant Teacher ha ki skul Sorkar L.P. hapoh Dadenggre Sub-Division ïa kaba la pyndep dang shen bad ka risol kaba la pynbna ha ka 10 tarik Kyllalyngkot, 2024, kumjuh haba ïadei bad ka jingmih khubor ha kawei ka kotkhubor phareng ha ka 13 tarik Jymmang, 2024 halor ka jingujor pyrshah ïa u nonghikai Dadenggre halor ki kot ki sla ba thok, la pyntip sha baroh kiba dei khmih bad kum shi bynta ban pynshisha ïa ki jingujor kiba la ujor ha kane ka liang, la dep thaw ïa ka komiti lai kyrdan ban tohkit halor kine ki jingkynnoh,” la ong u Director of School Education & Literacy (DSEL), u Swapnil Tembe ha ka kyrwoh khubor.
U la ong ruh ba kane ka komiti tohkit jong 3 ngut ki dkhot kan kynthup ïa u District School Education Officer, West Garo Hills, Tura kum u Chairperson lem bad ki Sub-Divisional School Education Officer jong ka Tura bad Ampati kum ki dkhot.
“Ka komiti kan sa khmih bniah ïa ki jingujor bad pynshisha biang sa shisien ïa ki kot ki sla jong baroh ki kyrtong kiba la seisoh. La ai por 25 sngi ïa ka komiti ban aiti ïa ka kaiphod sha uba la soi harum,” la ong u Tembe.
