Shillong, Jymmang 15
Ha ka sien banyngkong, ka Sorkar India ha ka Sngi Balang ka la ai syrnod nongshong shnong sha 14 ngut ki briew hapoh ka Citizenship (Amendment) Rules, 2024 hadien ba la pyntreikam ïa ka Citizenship (Amendment) Act.
Ïa kitei ki syrnod sha ki 14 ngut la sam da u Secretary ka tnat Korbar Ri, u Ajay Kumar Bhalla, ha ka jingïalang kaba la long ha nongbah New Delhi.
Ha u kyrwoh na ka Sorkar Pdeng, la ong ba ka sorkar ka la pynbna ïa ka Citizenship (Amendment) Rules, 2024 ha ka 11 tarik Lber, 2024. Kine ki Rule ki dei halor ka kot ba donkam ban pyndap lane ka Application Form, ki kam ban hap leh da ki District Level Committee (DLC) halor kine ki kot ba ïoh pdiang, bad ka jingpeit bniah bad ban rai ban ai syrnod nongshong shnong da ka State Level Empowered Committee (EC).
Hadien ba la pynbna ïa kitei ki Rule, ki la don ki briew kiba dei ki Hindu, Sikh, Jain, Buddhist, Parsi bad Khristan kiba dei na Pakistan, Bangladesh bad Afghanistan, bad kiba la rung sha India haduh ka 31 tarik Nohprah, 2014, namar ka jingshah ban beiñ na ka daw ka jingngeit lane ka niam jong ki, kiba la phah ïa ki kot ki sla ban kyrpad ïa ka sorkar ban ai syrnod ïa ki ba kin long kum ki nongshong shnong ka Ri India.
Ïa kitei ki kot ki sla la peit da ki District Level Committee (DLC) ba la khlieh da ki Senior Superintendent of Post lane Superintendent of Post. Hadien ba la lap ba ki kot ki sla ki biang nadong-shadong, ki DLC ki la phah ïa kita ki kot sha ka State Level Empowered Committee ba la khlieh da u Director (Census Operation). Ïa ki kot ki sla la ai bad peit bniah lyngba ka ‘Online Portal’.
