xNongstoiñ, Jymmang 15
Ka Hynñiewtrep Youths’ Council (HYC) Ri Mulliang Circle ka dap da ka jingsngewkhia bad sngew artatien ba ïoh lehse u drok un ïoh ban rung laitlan ha ka thaiñ hadien ba ka la lap ba ki don ki bar Jylla kiba wan die pathar ïa ki dawai hapoh ka thaiñ Tynghor bad kiwei ki shnong ba marjan kiba don ha ki thaiñ khappud.
Halor kane ka bynta, na ka liang jong ka seng hapoh ka jingïalam u samla Disterborlin Wanniang, President ka HYC Ri Muliang Circle ryngkat ka jingsynranlang ruh u President ka HYC WKHD u samla Lumlang Kharsyiemlieh ha ka Sngi Balang ki la leit ban ïakynduh ïa ka DMHO ka West Khasi Hills District ban ïakren halor ka jingwan poi ki bar Jylla ban die dawai ha ka thaiñ Tynghor, Langja, Langpih bad kiwei shnong khappud ka WKH.
Na ka liang jong ka seng ka la pynsngew ruh hakhmat ka DMHO ba nalor ka jingdon ki bar Jylla ba wan die dawai pathar, ki la don ruh sa ki nongdie jingbam kiba shu wan thad madan bad die pathar kaba lah ban buh jingma ïa ka koit ka khiah jong ki paidbah. Namar kata, ka seng ka kyntu ruh ïa ka DMHO ba kan leh eiei bad shim khia halor katei ka bynta.
Na ka liang jong ka DHMO ka la kular ba kan sa shim khia ïa katei ka jingkyrpad jong ka seng bad kan sa leh ïa kaba donkam.
