Tura, Jymmang:
Kawei ka hati khlaw kaba don bad ka kynhun kaba la ïaid sha ki bynta jong ka Ri-lum Garo ka la kyllon ïap ha ka miet Lah Sngi U Blei hadien ba ka la leit tyngkhuh ïa uwei u sainar ilektrik uba la noh rynjup hajan ka shnong Garobadha ha South West Garo Hills (SWGH).
Katei ka hati ka don bad kawei ka kynhun (hati) kaba la ïaid la ïeng lyngba ka thaiñ Wakhagre – Doldegre la katto-katne taïew mynta. Katei ka thaiñ ka hap hapoh ka lynti ïaid ki hati bad ki nongshong shnong ki la pyntip ba ki hati dang shen ki la ïaid sha ki bynta jong ka surok Garobadha – Selsella.
Katei ka jingjia ka la jia ha ka por ba katei ka hati ka dang pyrshang ban jam sha shiliang jong ka shnong Chokingre kaba don ha katei kajuh ka surok. Utei u sainar ilektrik uba katei ka hati ka la leit tyngkhuh u dei uba don bording (11KV) ha kawei ka liang kaba la ïalam sha ka jingshah bat bording. Na ka liang ka tnad Wildlife ka la leh ïa ka ‘Post Mortem’ halor kane.
Hadien katei ka jingjia, u DFO ka tnad Wildlife, u Rupankar Marak u la ong ba u la thoh sha u EE ka MePDCL ban leit jurip mar-mar ïa ki sainar 11 KV hapoh ka distrik.
“Kino-kino ki sainar kiba noh rynjup dei ban leh eiei noh kloi ban weng ïa ka jingma jong ki hati lem bad kiwei-kiwei ki mrad khlaw kiba ïaid hapoh ka thaiñ,” la ong u DFO.
Ka jingshah bat bording ki mrad khlaw ba kynthup ïa ki hati nalor kiwei-kiwei ka jia khari-khari hapoh ka thaiñ khamtam namar ka jingbym shimkhia na ka liang ka tnad bording, wat hadien ba la pyntip shaphang kiba kum kitei ki sainar – ka shim por slem bah ban pynbeit.
