Shillong, Jymmang 15
U Myntri Rangbah ka jylla, u Conrad K. Sangma u la ong ba ka eksamin Common University Entrance Test (CUET) ba la pynlong da ka National Testing Agency (NTA) ka sorkar pdeng ka dei ka eksamin kaba la pynlong ha ka sien kaba nyngkong eh ha lai tylli ki jaka thoh eksam ne ki ‘Centre’ hapoh ka jylla Meghalaya kata ha Shillong, Jowai bad ha Tura da kaba pynpaw ba ka jingpynlong ïa katei ka eksamin kan sa ïaid beit-ïaid ryntih ha ki snem ki ban wan.
Halor ka jingmih ki kynrum-kynram bad ki jingdkoh treikam ha kawei na ki jaka thoh eksam CUET kaba don hapoh nongbah Shillong kata hapoh ka skulbah North Eastern Hill University (NEHU) ha ka Sngi Balang, u Myntri Rangbah ka jylla u la ong ba u kyrmen skhem ba kum kine ki jingeh kin nang mih shuh hynrei kin sa nang ïaid beit ïaid ryntih ha ki por ki ban sa wan namar ba kane ka jingpynlong ïa kane ka eksamin ka dei ha ka sien kaba nyngkong kaba la pynlong hapoh ka jylla.
“Ka CUET eksam ka dei kaba la pynïaid da ka NTA ka sorkar pdeng ym kaba la pynïaid da ka sorkar jylla bad kumta ka dei hapoh ka jingpeit jingkhmih jong ki hynrei lada ki don ki jingeh hangne-hangtai, ngi kloi ban shim khia ïa kata”, la ong u Myntri Rangbah.
U la pynkynmaw ruh ba ha ki sngi kiba dang shu dep shen ka la mih ka kynrum-kynram ha kaba ïadei bad ka jingpynïaid ïa ka rukom thoh eksam jong ka NEET hynrei wat la kane ka eksamin ruh ka dei kaba la pynïaid da ka sorkar pdeng hynrei na ka liang ka sorkar jylla ka la shim khia halor kane ka kam.
“Lada ki don kino-kino ki jingeh ha kaba ïadei bad ka rukom thoh ïa ka CUET eksam ruh, ngin sa ïakren bad kane ka Agency kaba dei khmih bad ngin sa ong ïa ki ba kin tuklar bad khmih lem halor kane ka jingeh”, la ong u Myntri Rangbah.
U la ong ba wat la ha ki snem kiba la dep, ki samla pule ka jylla Meghlaya ka la lait ban hap thoh ïa kane ka eksamin namar ka jingbym biang ki jaka thoh eksamin bad wat la mynta ruh ka jylla ka dang duna bha ki jaka thoh ïa katei ka eksamin, hynrei kaba sngewtynnad pat ka long ba baroh pat ki thaiñ hapoh ka jylla ki la don ïa ki jaka thoh eksamin kata ha Shillong, Jowai bad ha Tura. U la ong ba kane ka eksam ka long salonsar ïa ki khynnah kiba kwah ban ïoh rung ban pule ha ki kolej kiba pynïasoh bad ki Central University bad ha Meghalaya pat ïa ki kolej kiba pynïasoh bad ka NEHU.
Shuh shuh u Myntri Rangbah u la ong ba hadien ka jingpynthymmai bad ka jingpynkylla ïa ki aiñ jong skulbah ka jylla kata ka Captain Williamson Sangma University, ka sorkar jylla kan sa pynïasoh ïa ki kolej baroh kiba don hapoh ka NEHU bad katei ka skulbah kaba thymmai khnang ba ki kolej ki bym pat pynïasnoh ïalade bad ka NEHU kim donkam shuh ban pynïasnoh bad ka NEHU ha ki por ban sa wan hynrei ki lah ban pynïasnoh noh bad katei ka skulbah bathymmai jong ka jylla ka ban pynsuk pat ïa kitei ki kolej ki bym kwah ban pynlong ïa ka CUET.
