Shillong, Jymmang 15
U Myntri Rangbah ka Jylla u Conrad K Sangma u la ong ba hadien ba ka la don ka jingujor da ka ejahar ka jingtohkit ruh kan ïaid katkum ka aiñ bad ka jingujor pyrshah ïa u Director General of Police (DGP) u Dr. Lajja Ram Bishnoi ba kynnoh pyndonkam ïa u nombor plate thok, kan ïai bteng beit wat hadien ba u la shongthait na ka kam.
Haba kren sha ki lad pathai khubor, u Conrad u la ong ba ïa ka ejahar (FIR) ba la ujor, la dep ban pynrung bad kumta ka mukotduma kan ïai bteng beit bad ka jingtohkit ruh kan ïaid shakhmat.
U la ong ba shisien ba la dep ban ujor bad haba la pynrung mukotduma, ka jingtohkit kan ïaid bad kam don eiei bad ka kam shongthait.
Shuh shuh na ka liang jong u Myntri Rangbah u la ong kam pher wat la dei mano-mano, hynrei shisien ba la ujor da ka ehajar, ka jingtohkit kan hap ban ïaid beit katkum ki kyndon jong ka aiñ bad katkum ka aiñ, kaei kaba donkam ban hap leh bad katkum ki kyndon, kaei kaba donkam ban leh, yn hap ban bud ïa ka.
Lah ban pynkynmaw ba ha ka 9 tarik Jymmang, u Assistant Inspector General (AIG) ba la shah sospon ka tnat Pulit u Bah G.K Iangrai u la ujor da ka ejahar pyrshah ïa u DGP ha thanat Sadar ba u la pyndonkam bakla bad leh thok ïa u numbor ba pyndait ha ka kali jong u.
Haba pynpaw ba ka aiñ kan ïaid ha la ka jong ka lynti, u Myntri Rangbah u la ong, “Ngi la kren shai naduh ka sngi ba nyngkong ba ha man la ki khep ba ngi ïatyngkhuh bad ka aiñ, ka aiñ ka dei kaba long kumjuh ïa baroh, bad kumta ka aiñ hi kan ïaid ha la ka jong ka lynti”.
Ha kawei pat ka liang, u DGP u la dep ban mudui sha ka ïingbishar ban kheiñ ïap ïa ka ejahar bad kam ba kane ka ejahar kam dei satia kaei-kaei ruh hynrei tang ka jingkput bad buh shun pyrshah ïa u namar ba la kem bad sospon ïa u Bah G.K Iangrai ha ka por ba long DGP ma u.
