Shillong, Jymmang 15
Kan long mar khongphong ha jingim jong ngi ki briew namar kiba shong hapoh kali ki lynga lada slem ban pynïaid ïa ki kali ban jam sha shiliang ka jingkieng Umïam kata kiba leit na Shillong bad kiba wan na Ri Bhoi haba dang ïaid ka jingmaramot ïa ka jingkieng Umïam. Hynrei ha kawei ka liang ki nongdie soh pat ki kmen lada slem ban pynïaid ïa ki kali namar ki lah bha ban pynïaid ïew ïa ki soh ba ki rah ha ka shang.
Ha ka jingleit lum khubor kyrpang U Nongsaiñ Hima, la lap ba ki nongdie soh kiba kynthup ïa ki kynthei bad shynrang ki la sdang bun ban tyrwa soh haba ki kali kiba wan na Shillong ki dang ïeng laiñ katba ki pulit ki dang pyllait ïa kali kiba wan na Ri Bhoi.
Kane ka tyrwa die soh ka la sdang naduh ka jingkieng Umïam haduh ryndang briew lada jur bha ka jingsahkut ki kali.
Ym tang ki nongdie soh, hynrei kiba die shana ruh ki don kiba ïaid ban tyrwa na kawei ka kali sha kawei pat.
Kine kiba die soh ki kham bun kiba wan na ki thaiñ Smit bad Sohïong kiba la wan da kali ryngkat ki shynrang.
Kine kiba die soh ki la ïathuh ba ki kali shimet ki kham thied bha ïa ki soh jong ki hynrei ki kali kamai ki kham duna.
Ki la ïathuh ba lada shit ka sngi bad slem ban pynïaid ïa ki kali ki soh ki ïaid bha hynrei lada hap u slap ka duna bha ka ïew.
Ki la ïathuh katba dang maramot ïa ka jingkieng bad shit ka sngi kin nang bteng ban wan die ïa ki soh.
Ka jingsdang ban wan tyrwa soh ha kane ka surok ka la sdang bun mynta mar shu mih u bnai pyrem namar ka jingshit ka sngi.
Katba ar ngut ki kynthei kiba leit tyrwa die soh ha ki kali kiba dang sahkut katba dang maramot ïa ka jingkieng ha Umïam wat lada kim sngewthuh ban kren ïa ki briew kiba nabar ka jylla hynrei ki la lah ban die ïa ki soh jong ki ha ka shang da kaba shu ak ne shu pyni da ka kti.
Kine ar ngut kynthei ki dei na Mawblang kaba don hajan Jongksha, Mawkynrew Block, East Khasi Hills District ki la wan ryngkat bad ki bahaïing ban rah da ka shang ban tyrwa die soh.
Kine ki kynthei ki la ïathuh ba kim don ka jingsngewlehraiñ wat la kim sngewthuh ïa ka ktien hynrei ki lah pat ban die ïa ki soh sha ki briew nabar jylla haba ki mut ban leit phai noh sha jylla ba ki wan.
Ki la ïathuh ba ki mih na shnong naduh dangstep bad leit phai pat hapoh ka 6 baje janmiet.
Ki la ïathuh biang ba lada ka sngi ka shit bha bad lada jur ka jingsahkut kali ki soh ba ki die ka ïaid bha, hynrei lada hap u slap ka la thut noh ïa ka ïew jong ki.
Ha kane ka jingtyrwa die soh la sakhi ruh ba uwei u khynnah u la hap ban kit ïa u sohshan (strawberry) haduh 40 song hapoh pla ban tyrwa die ïa ki kali kiba dang ïeng laiñ ha jingkieng Umïam tang ban ïoh pyndap ïa ka ïing ka sem.
Une u khynnah u la ïathuh ba u la wan die sohshan mynta la artaïew bad u die ha ka dor T.130 shi song bad man ka sngi u ju lah ban die haduh 40 song.
U la ïathuh ba ïa kine ki soh la ju thied na ki thaiñ Syntung bad Nohron, hynrei u leit shim mynstep na Ïewduh bad mynsngi pat u wan die sha jingkieng Umïam ryngkat bad ki bahaïing kiba ïawan lang.
Nalor nangta, u la phla ba wat la ka khlieh ka pang haba u kit haduh 40 song u sohshan, hynrei u hap ban trei shitom ban pyndap ïa ka ïing ka sem.
