Shillong, Jymmang 15
Ka Hynñiewtrep Youths’ Council (HYC) Sengkmie hadien ka jingïoh jingtip bad ka jingujor ba ka la don ka jingkulmar kaba la mih namar ka jingbym biang ka rukom pynbeit thoh ïa ka eksamin Common University Entrance Test (CUET) ha kawei na ki jaka thoh eksamin CUET kaba don hapoh ka jylla kata hapoh ka skulbah North Eastern Hill University (NEHU), ha ka Sngi Balang ka la pynlong ïa ka seng ban leit mar-mar sha katei ka skulbah ban tuklar lem halor katei ka jingjia.
Haba kren sha ki lad pathai khubor, na ka liang u President ka HYC, u Bah Roykupar Synrem, u la ong ba haba ka seng ka la poi ha katei ka jaka pule, ka la lap ba ka rukom pynïaid ka NEHU ïa ka jingthoh eksamin ka long kaba bakla haduh katta-katta ha kaba kim shym la lah ban pynbiang wat ïa ki jingdonkam na ka bynta ki khynnah thoh eksam.
U Bah Roykupar u la ong ba lyngba ki dur khih ba la ring ha katei ka skulbah la ïohi ba ki samla ki la shu khynñiat iwei ïa iwei namar ka jingkhapngiah eh kaba lah ruh ban ïalam wat shaduh u pud ka jingjia ki jingmynsaw.
U Bah Roykupar u la ïathuh ruh ba ha ka por ba ka seng ka la poi ha katei ka jaka ka la ïohi ba na ka liang ki nongpynïaid ïa katei ka eksamin kiba dei ha ka por 3 baje janmiet ki dang ïa wad sah ïa ki jingkylli ban ai sha ki khynnah thoh eksam bad tad haduh ka por 5 baje ruh, kitei ki khynnah kiba dei ban thoh ïa ka eksam ha ka por 3 baje kim pat ïoh satia ban thoh ïa ka eksam jong ki.
“Kane ka jingleh jong ka NTA bad kumjuh ruh ki bor pynïaid jong ka NEHU ka pyni ba ka la don ka jingdkoh treikam ha ka rukom pynïaid ïa ka eksam. Na ka liang ka seng, ngi sngewkhia haduh katta-katta namar ba ngim kwah ba kumba ka jylla ka la pdiang ïa ka CUET ba nangne shakhmat ki khun samla jong ngi kiba kwah ban leit pule ha ki kolej bapher-bapher kiba pynïasoh bad ka NEHU bad kiba hap ban pas ïa ka CUET hynrei lada kum kine ki jait jingjia ki jia, ngi sngewsih ban ong ba kan jia aiu ïa ka lawei ki khun samla jong ngi lada kim ïoh ban thoh ïa kane ka eksam”, la ong u Bah Roykupar.
Ka seng ka la pynpaw ruh ïa ka jingsngewsih ba hadien ba ki la phone ïa u Myntri ka tnad pule puthi ka jylla, u Rakkam A. Sangma halor kane ka jingeh ki khun samla ka jylla hynrei ka jubab kaba ka seng ka la ïoh na utei u Myntri ka long ba u la ong ba ka sorkar jylla kam lah ban leh eiei ïa kane namar ka dei ka kam kaba la pynïaid da ka National Testing Agency (NTA) napoh ka sorkar pdeng.
Ka seng ka la pynrem ruh ïa ka sorkar jylla ba kam lah ban pynbeit ïa kane ka jingeh bad ruh ka la pynrem ïa ka National Testing Agency ba ka la pynlong ïa kane ka eksam khlem da pynbit pynbiang ïa ki jingdonkam baroh.
“Kiba kum kita ki nongïalam ne ki nongmihkhmat paidbah jong ngi kiba bym shim ïa ka jingkitkhlieh, ngi sngew ban pynrem jur ïa u Myntri ka tnad pule puthi bad kumjuh ruh ïa ka sorkar jylla kaba thet kti bad ong ba kam lah ban leh eiei namar ïa kane ka eksam la pynïaid da ka NTA”, la ong u Bah Roykupar.
U Bah Roykupar u la ong ba ka seng kan ïai buddien ïa kane ka kam bad lada don ki samla pule ki bym ïoh klas hapoh ka jylla tang namar kane daw kaba la pynjynjar ïa ki na ka jingdkoh treikam ka NTA bad ka sorkar jylla, ka seng kan sa shim da kiwei ki sienjam halor kane ka kam.
