Shillong, Jymmang:
Kum shibynta ka jingïaid lynti sha uwei pat u mawmer, ka MEEPO Management ha ka 14 tarik u Jymmang 2024 ka la plie pyrda ïa ka Miss Grand India Meghalaya 2024 kaba la pynlong ha Courtyard by Marriott.
Kane ka rynsan ka ban sa long ka dak halor ka jingitynnad ka jylla Meghalaya ïa kaba la tip kum ka “Ka Jaka Shong Ki Lyoh” lane “The Abode of Clouds” kan long ka bynta kaba thymmai ïa ki khynnah samla kynthei ki ban pyni ïa ki sap ki phong jong ki ban mihkhmat ïa ka jylla.
Ha katei ka jingïalang kaba lyngkot la sdang shwa da ka jingpynithuh ïa ka projek jong ka Miss Grand India Meghalaya kaba dei ka projek kaba thmu ban lehkmen halor ka jingpynkupbor ïa ki kynthei khnang ba kin tyngshaiñ ha ki rynsan baheh jong ka pyrthei ha ryngkat ka jingpynleit jingmut ïa ka jingdon ka mynsiem ba shida bad ka jingkut jingmut ban kren halor ki mat bapher-bapher kum ka jingpynsngewthuh paidbah halor ka jingpang bampong. Kane ka rynsan ka angnud ban pynkiew ïa ka imlang ka sahlang da kaba pdiang burom ïa ki nongïashimbynta kaba kynthup naduh ka jingstad, ka jingbhabriew bad ka jingkyrkhu jong ki.
La plie ïa kane ka jingïalang da ka Kong Wanda Mary Lyngdoh Nongbri kaba dei ka State Director jong ka Miss Grand India Meghalaya.
Ha kane ka jingïalang la don ryngkat lang ruh da ki kongsan kiba kynthup naduh kiba la ju jop ïa ka jingïakob nangta u Amjat Khan uba long kum u Operations and Marketing Director jong ka Glamanand Entertainment Private Limited, ki ‘riew pawkhmat kiba seng kam lajong bad ki ‘thei bhabriew kiba kynthup ïa ka Miss Grand International India 2023, ka Arshina Sumbul bad ka Miss Asia Pacific India, 2024 ka Sofia Singh bad kiwei kiwei ki Model.
Haba ai jingkren ha katei ka sngi, na ka liang ka Kong Wanda Mary Lyngdoh Nongbri kaba dei ka State Director jong ka Miss Grand India Meghalaya ka la batai pynshai ha kaba ïadei bad kane ka jingïakob kaba dei ban ai rynsan ïa ki khynnah kynthei kiba dangrit ba kin ïohlad ban pyni ïa ki sap ki phong jong ki bad ban wanrah ïa kaba bha tam na ka bynta ka imlang ka sahlang.
Kumba ka ju long ïa ka ‘Audition’ na ka bynta ka Miss Grand India Meghalaya yn sa pynlong ha u bnai Naiwieng bad ïa ka phainal yn pynlong ha ka taïew ba khadduh jong u bnai Naiwieng bad ka taïew banyngkong jong u bnai Nohprah ha ki distrik bapher-bapher jong ka jylla kiba kynthup ha Nongpoh, Shillong, Tura bad ha Mairang lane ha Nongstoiñ.
Ki nongïashimbynta kiba lah ban ïashimbynta ki dei ban don ka jingjrong kaba 5.4 bad kibym don ïashongkha.
Ka kynhun ka ban pynïaid ïa ka Miss Grand India Meghalaya ki kynthup ïa ka Butterfly bad ka Meepo Management.
Na ka liang ki nongpynïaid ki angnud ïa ka jingïashimbynta shitrhem jong ki khynnah samla kiba thrang ban kiew sha kliar ha ka jingïaid lynti da ka jingkyrshan jong ka shnong ka thaw bad ka jingdon ka mynsiem ban ïashimbynta, ka jingïakob Miss Grand India Meghalaya ka la long kaba pynkhreh ban pynlong ïa ka jingai mynsiem ïa ki khynnah samla ka jylla.
