Shillong, Jymmang 15
Ki pulit ka jylla ha ka Sngi Balang ki la pyntip ba uwei u nongshong shnong ïa uba la tip kyrteng kum u Damewanmi Suchiang, u la ujor ba ha ka 13 tarik Jymmang ha ka por kumba 4:20 mynstep, ki runar ki bym lah ban ithuh, ki la leit prong ha ka dukan jong u kaba don ha Rymbai Filling Station, Mawlai Mawïong, bad ki la tuh ïa ki mar ki mata bapher-bapher bad ka CCTV ‘Monitor’. Hynrei, la ong ba ïa katei ka jingjia shah tuh, la ïoh ring dur da ka kor CCTV kaba don ha katei ka jingjia.
Ha kawei pat ka jingjia, ki pulit ki la ong ba uwei u nongshong shnong ba la tip kyrteng kum u Dapborlang Khongthah u la ujor ba ha 5 tarik Jymmang ha ka por kumba 8 baje mynmiet, ki runar ki la tuh ïa ka ar shaka jong u kaba la pynïeng hajan ka skul Seng Khasi, Jaïaw.
Nalorkata, ki pulit ki la pyntip ba ha ka 13 tarik Jymmang, ki runar ki la leit prong ha ka ïing sah jong ka Kong Domeris Khongsit ha Baniuñ, Upper Shillong bad ki la tuh la thiem na kane ka ïing.
Shuh shuh ki pulit ki la ong ba u Satyanarayan Sharma na Lower Babupara, Tura u la ujor ba ha ka 11 tarik Jymmang ha ka por kumba 6:30 mynstep, ka thuk-thuk jong u ka la jah na ka jaka ba la pynïeng ïa ka.
