Shillong, Jymmang 15
Ki samla kiba thoh ïa ka eksamin Common University Entrance Test (CUET) 2024 kiba la wan na ki jaka bad ki distrik bapher-bapher ba la pynlong hapoh ka skulbah North Eastern Hill University (NEHU), ha ka Sngi Balang ki la ïa kulmar thlim ban ïeng bad ban ap ïa ka por thoh eksamin namar naduh ka por 12 baje mynsngi haduh ka por 4 baje janmiet ruh ki khlem pat lap wat tang ïa ka kamra thoh eksam.
Kum ban shu kdew hangne, ka dei ha ka sien kaba nyngkong ba ka jylla Meghalaya ka la pynlong ïa ka eksamin CUET ha kane ka kynti kaba mynta kaba la sdang ha ka 15 tarik u Jymmang 2024 kaba la pynlong ha lai tylli ki Centre kata ha Shillong, Jowai bad Tura.
Kane ka eksamin ka la sdang naduh ka 15 tarik u Jymmang 2023 bad kan kut ha ka 24 tarik u Jymmang 2024 ka ban pynlong ha 26 tylli ki Centre ha kylleng ka jylla kata 12 tylli ha Shillong, 5 tylli ha Jowai bad 9 tylli ha Tura.
Katkum ka jingïoh jingkheiñ ki don baroh 8,535 ngut ki khynnah ki ban ïakhun ïa ka eksam ha ki Centre ha nongbah Shillong katba 5,618 ngut ha ki Centre ha Tura bad 4, 269 ngut ha ki Centre ha Jowai.
Ha katei ka sngi nalor ka jinghap slap ka la wanrah ruh ïa ka jingtyngngaiñ bad ka jingkhynñiat na ka jingbun palat kiba la ïeng laiñ ban wad ïa ki kamra ba ki dei ban thoh ïa ka eksam.
Kane ka jingkulmar ki samla ba thoh eksam kadei namar ka jingbym tip bha ïa ki kamra ban thoh eksam na ka jingbym pynbiang ïa ki rukom batai ne pynshai bad kaba la pynkulmar bad pynsah lyngngoh ïa ki khynnah ka long ba kim tip haei ka mala ba ki dei ban thoh. Lada ki leit ban wad ha ki kamra ki la shah phah pynban na kawei ka kamra bad ka mala sha kawei pat bad ym tang katta wat ki khynnah kiba la shong hapoh ki kamra thoh eksamin ruh ki dang don kiba la shah pynmih shabar.
Haba ïoh ban ïakren bad ki kmie ki kpa bad ki bahaïing-bahasem kiba la wan ban synran ïa kitei ki samla kiba la wan ban thoh ïa katei ka eksam, ki la ïathuh ba ki la wan synran ïa ki khun jong ki naduh ka por 12 bad 1 baje mynsngi ha NEHU hynrei wat haduh ka por janmiet ruh ki khun jong ki kim pat ïoh satia ban shong wat hapoh ka kamra klas ruh.
Kitei ki kmie ki kpa ki la pynpaw ruh ba ki don ki samla kiba dei ban thoh eksam ha ka por 1 baje mynsngi hynrei wat haduh ka por 4 baje janmiet ruh kim pat ïoh rung ne lap ïa ka kamra ba ki dei ban shong bad ban thoh ïa ka eksam.
“Kaei kaba ngi ïohi hangne ka long ba kam long kaba la pynkhreh bha ha kata ka rukom, ym don ki ban pyni lynti ha kano ka mala ba ki dei ban leit thoh hynrei ki khynnah ki la shu mareh sharum-shaneng bad ki kmie ki kpa bad ki hymmen ki para bad ki paralok kiba la wan synran ïa ki, ki la kulmar hi thlim”, la ong kitei ki kmie ki kpa.
Shuh shuh kitei ki kmie ki kpa ki la ong ruh ba namar ka jingmareh bad ka jingsheptieng jong ki katto-katne ki samla ba ïoh lehse kim ïoh ban thoh ïa katei ka eksamin, ka la pynlong ïa ki katto-katne ngut ki samla ba kin kyllon ïap-ler ha madan bad la pynkit noh ïa katei ki samla sha ka jaka ai jingsumar.
Nalor ka jingïoh slem jong ki samla ïa ki ‘Admit Card’ ban leit thoh ïa katei ka eksam CUET, na ka liang ki kmie ki kpa jong ki samla ki la pynpaw ruh ba lyngba kine ki kynrum-kynram bad ki jingjia kiba la jia na ka daw ka jingbym pynbit pynbiang ïa ki rukom thoh eksamin jong ki samla. Kumta kum ka sorkar ka dei ban pynbeit ryntih nangne shakhmat ïa ka rukom thoh eksamin ki khynnah pule ka jylla khnang ba kum kine ki kynrum kynram bad ki jingeh jong ki samla kin nym don satia.
“Ka long kaba sngewsih ban jia kumne hynrei ngi kyrmen ba ka sorkar nangne shakhmat lyngba kane ka jingjia mynta ka sngi, ka dei ban pynbeit bha bad kane ka jingjia ka la jia hapoh kane ka phyllaw jong ka NEHU hynrei ngim tip pat ba ïoh lehse kum kine ki jingjia ki la jia ha kiwei ki jaka thoh eksamin ruh kiba don hapoh ka jylla”, la ong kitei ki kmie ki kpa.
Kum ban shu pynkynmaw, ïa ka eksamin CUET la pynïaid da ka National Testing Agency (NTA).
