Shillong, Jymmang 15
Ka Khasi Authors’ Society (KAS) ka la ong ba kan ap shuwa ïa ka Sorkar bathymmai ka ban wan ha ka Sorkar Pdeng ha shuwa ban shim ïa ki sienjam ban buddien halor ka jingdawa pynrung ïa ka ktien Khasi ha ka Khyrnit ba 8 jong ka Riti Synshar ka Ri.
“Hadien ba la wan na Delhi, ngi la pynpoi ïa ka dorkhas sha ka tnad kam pohïing bad Tribal Affairs jong ka Sorkar Pdeng bad phah kopi ruh sha u Myntri ka tnad kam pohïing ka Sorkar Pdeng kumjuh sha u Myntri Rangbahduh ka ri bad ka President ka ri,” la ong u President ka KAS, Dr. D.R.L. Nonglait.
Ka KAS ha u bnai Nailur jong u snem ba la dep ka la leit ban pynlong ïa ka jingïakhih ba jai-jai ha Jantar Mantar, New Delhi halor ka jingdawa ban pynrung ïa ka ktien Khasi ha ka Khyrnit ba 8 jong ka Riti Synshar ka Ri.
U Dr. Nonglait u la ong ba hadien katei, ka seng ka la ïakynduh ïa u Myntri Rangbah ka Jylla bad pynsngew ha u ban phah ïa ka jingkyrpad (kumba ka seng ka la leh) sha ka Sorkar Pdeng ban wanrah ïa ‘Official Bill’ halor katei ka mat ha ka Dorbar Tlang ba dang shu dep jong ka Parliament ïa kaba u Myntri Rangbah u la kular ïa kane.
U la ïathuh ba haba la pyrshang wad jingtip haba ïadei bad kane, la ïoh jingtip ba la dep ban phah, wat la ka seng kam shym la ïoh kopi ïa ka jingthoh.
“Haba peit ha ki rynsan lad pathai, ka don ka shithi kaba la phah, hynrei ym kum kaba la phah da ma ngi bad kam shym la don jingkdew eiei halor ka ‘Official Bill’. Kane ka jingbuddien jong ka Sorkar Jylla kam long kaba shai naba ym shym la ai kopi sha ngi,” u la ong.
Haba kdew ba ka samoi treikam jong ka Sorkar ha Delhi kan sa kut noh shen, u Dr. Nonglait u la pynpaw ka jingkyrmen ba ka Sorkar Jylla kan buddien ïa katei ka kam ha ka rukom kaba kham tyngeh ynda la wan ka Sorkar bathymmai.
“Ngin ap ïa ka Sorkar thymmai bad ngin sa shim ki sienjam kumno ban ïaid shakhmat bad kane ka kam,” u la ong.
Ha kawei ka liang, u President u la ong ba ka seng ka dawa na ka Sorkar Jylla ban ithuh noh ïa ka Khasi kum ka ‘Official Language’ ne ka Ktien Sorkar nalor ka ktien Phareng bad ym tang kum ka ‘Associate Official Language’ khnang ban ïoh pyndonkam ïa ka ha baroh ki distrik ka Ri-lum Khasi-Jaiñtia.
“Haba ngi ïakynduh ïa u Myntri Rangbah, u la kular ban khmih bniah bad pan jingmut na ka tnad Aiñ bad Lariti halor kane ka kam. Lehse kim pat dep, hynrei hadien ka jingïalang General Council jong ka seng, ngin sa buddien halor kane ka bynta,” la ong u nongïalam ka KAS.
Shuh shuh u la bynrap ba ka seng kan sa ïakren kumno ban pynkhlaiñ ïa ka jingdawa ban pynrung ïa ka ktien Khasi ha ka Khyrnit ba 8 ha ka General Council ban wan.
