Jowai, Jymmang:
Ka projek kaba shisnem lynter kaba tip kum ka “Scheme on Studies for Promotion & Strengthening of Black Pottery at Tyrshang and Larnai village, West Jaiñtia Hills District, Meghalaya” kaba la bei tyngka da ka tnat Commerce and Industries (DCI) Shillong bad kaba la pyntreikam da ka Mahatma Gandhi Institute of Rural Industrialization (MGIRI) Wardha, Maharashtra, R&D Institute hapoh ka Ministry of MSME, jong ka sorkar kmie la pynkut noh ha ka 14 tarik Jymmang.
Kane ka projek kaba shisnem lynter la pynwandur da ka MGIRI ha ki ar Phase, kata ka Phase-1 bad Phase-11. Ha ka Phase-1 ka long ban pule ïa ki khiew khyndew bad kumno ban pynwandur ïa ki, katba ka phase-II ka long ban ai jinghikai ïa ki nongthaw khiew khnang ban neh ban sah pateng la pateng.
La pynkut ïa kane ka projek ha ka jingïalang kaba la long ha Larnai Community Hall ha ka jingdonlang u Bah ML Wanshong, Joint Director DCI, Shillong, Bah B Warjri, General Manager, DCIC, Dr. K Venkata Rao, Dy Director MGIRI, Kong S Kharpran, Functional Manager, DCIC, Jowai, u Chairman shnong Bah Kyrmenlang Pyrtuh bad ki nongthaw khiew khyndew.
U Dr. K Venkata Rao, Dy Director MGIRI, Wardha ha ka jingkren u la kitbok kitrwiang ïa baroh ki nongthaw khiew khyndew bad u la kdew ïa ka jingdonkam ban don ïa ka sap ka phong bad jingtbit kaba ki ïoh ha kine ki shisnem ba ki don hapoh ka jingshah hikai. U la ong ka jingtrei shitom jong ki baroh shisnem ka pynlong ïa ki ban jop.
U Bah ML Wanshong, Joint Director DCI, Shillong u la ïaroh ïa ka kynhun jong kane ka projek kaba la trei shitom ban hikai ïa ki nongthaw khiew da kaba leit ïalam ruh ïa ki sha Siliguri bad Varanasi ban ïarap ban kyntiew shuh shuh ïa ka sap ka phong jong ki.
U la ong, kane ka projek ka long kum ka rynsan ban ïarap ïa ki nongthaw khiew khyndew ban pyni ïa ka sap ka phong jong ki. U la kular ba na ka liang ka tnat Commerce and Industries kan bteng ban ai ka jingkyrshan ïa ki.
Ki nongthaw khiew khyndew kila pynpaw ka jingsngewnguh ïa u Dr. K Venkata Rao, Dy Director MGIRI ryngkat ka kynhun jong u kumjuh ïa ka tnat Commerce and Industries. Ki pynpaw ruh ba kane ka jinghikai kaba shisnem lynter ym tang ba ka ïarap ban pyntbit ïa ki ha kane ka kam hynrei ka ïarap ruh ban ïoh ïa ka jingtip jingshemphang lyngba ka jingïalam ïa ki sha ki jaka bapher-bapher.
