Shillong, Jymmang 15
U Myntri Rangbah ka Jylla, u Conrad K Sangma u la pyni ïa ka jinglong-jingman ha Meghalaya naduh ka jingpher ha rukom bat khyndew kaba long kawei na ki daw ban shimpor ka jingpynkhreh ban sdang ïa ka jingtih dewïong katkum ka jingstad saïan tangba u la ong ba kane ka khubor babha kan sa poi shen sha ki paidbah ka Jylla ynda la dep ilekshon Lok Sabha.
Haba ïakren bad ki nongthoh khubor ha ka Sngi Balang, u Conrad u la ong ba ha ka jingshisha, ki kam kiba dei ki bynta jong ka Sorkar India ki la dep bad ka kam kaba dang sah mynta ka dei ka bynta jong ka Sorkar Jylla halor ka jingïada ïa ka mariang.
U la ong ba ka jinglong-jingman ha Meghalaya ka kham pher namar ka jingpher ha ka rukom bat khyndew ha kaba u la pynkynmaw ruh ba ka Supreme Court ka la pyllait ïa ka jingkhang tih dewïong da kaba banjur ban tih katkum ka jingstad saïan. Hynrei u la ong ba ka Sorkar India kam don ïa ki kyndon halor ka riti bat khyndew kumba long ha Meghalaya, ha kaba ïa ki jaka la long trai da ki riewshimet ym ka Sorkar katba ha kiwei ki bynta jong ka ri, ka jaka ka dei jong ka Sorkar bad kino-kino ki briew kiba kwah tih par, kin hap pan bad shim wai na ka Sorkar.
Kumta u la ong ba kum ka Jylla la khmih lynti ban yn sa lah ban ïakren noh ïa kane ka kam bad shen hadien ka ilekshon, kan sa don ka khubor babha tangba ym dei ban shu leh kulmar khamtam kum kane ka kam kaba dang sdang nyngkong eh ha Jylla namar ïoh don pynban ki jingbakla bad kam dei satia kaba suk.
