Shillong, Jymmang:
U Symbud Myntri Rangbah ka Jylla, Bah Sniawbhalang Dhar uba khmih ruh ïa ka tnat Pynroi Sor, u la ïathuh ba napdeng ki projek ka Smart City baroh, dei tang ka jingpyntrei ïa ka Smart Road ka kham suki naba ka la pynmih shibun ki jingeh.
Haba kren sha ki lad pathai khubor ha ka Sngi Ba-ar, u Symbud Myntri Rangbah u la ïathuh ba ka jingsuki jong kane ka projek surok ha ka Smart City ka dei namar ka jingbym ïoh jaka.
U la pyntip ba ka jingslem ka surok Smart Road ha Lachumiere ka dei na ka daw ka jingbym ïoh jaka bad ka Sorkar ka dang khmih bniah biang ïa kane ka projek.
U Bah Sniawbhalang u la ong, ka jingslem jong ka projek Smart Road nalor ka jingbym ïoh jaka, ka don ruh bun ki daw kiba kynthup ïa ka jingïatyngkhuh bad ki jingkyntur pud u paidbah, ka jinghap pynkynriah ïa ki post ilektrik, ka jinghap khang ïa ka ïaid ka ïeng ki kali ha ki jaka khim bad kiwei kiwei.
Shuh shuh u la pyntip ba ha kaba ïadei bad kane ka bynta, na ka liang jong ki tnat sorkar bapher bapher kiba ïa don bynta ki la dep ban shong jingïalang ban ïatai bad ïamir kumno ban pynbeit ha kaba ïadei bad ka jingpynïaid ïa ki pipe um, ki sainar ilektrik bad kiwei kiwei, kiba long ka daw kaba la buh ha ka jingeh ban pynïaid sted ïa ka projek.
Ha kawei pat ka liang, u la pyntip ba ka jingpyntrei ïa kiwei pat ki projek ka Smart City Project ki la ïaid bha shakhmat. U Symbud Myntri Rangbah u la ïathuh ba ki don haduh 17 tylli ki projek ba la pyntrei lyngba ka Smart City Project kiba kynthup ka jingtei ïa ki jaka pynïeng kali ne Parking Lot kiba la jan dep bad kiba dang ïaid shakhmat, ka jaka pynlang umslap bad kiwei kiwei.
Namar kata, u Bah Sniawbhalang u la ong ba ki la khmih lynti ba ha une u snem ba mynta, baroh ki kam ba la pyntrei jong kane ka projek kin dep noh hapoh 80 persen eiei.
