Shillong, Jymmang 15
U Deputy Commissioner & District Magistrate ka East Khasi Hills, u SC Sadhu, IAS, u la pynmih hukum ban khang lut ïa ki khyrdop lum khajna be-aiñ kiba don ha kane ka distrik lym kumta, ki bor ba dei khmih kin leh ïa kaba donkam.
Ha u kyrwoh jingpynbna ba la pynmih ha ka Sngi Balang, u Sadhu u la ong ba u la ïoh jingtip ba ka jingkhaïi mawshun da ki trok na Umdud sha Zero Point, kaba dei shi bynta na ka lynti ban leit sha Majai Land Customs Station, ka la shah pynsangeh ha ki nongshong shnong ka Majai.
Nalorkata, u la ong ba ki nongkhaïi mawshun ki la rai ban pynsangeh noh ïa ka jingïaid ki trok tad haduh ban da lah ban ïa pynbeit hapdeng ki arliang mamla, kata, ka Dorbar Shnong Majai bad u Syiem ka Hima Sohra.
Shuh shuh u Deputy Commissioner u la ong ba ka don ka jingshim khajna be-aiñ da u Syiem ka Hima Sohra na ki trok kiba ïaid lyngba ka Majai Land Customs Station, bad ka dor ba la buh ka long `400 man la kawei-pa-kawei ka trok. U la ong ba kane ka jingleh ka lah ban wanrah ïa ka jingïakynad.
U Deputy Commissioner u la ong ba ka sorkar jylla ka la pyntreikam da ka rai ban ym map ïano-ïano ha kaba ïadei bad ka jingpynïeng ïa ki khyrdop lum khajna be-aiñ lane ka jinglum pisa jubor na ki kali kiba ïaid lyngba ki National Highway, State Highway bad kiwei pat ki surok bakongsan ha East Khasi Hills.
La ong ruh ba ka jingbuh ïa ki khyrdop ban lum khajna be-aiñ ka pynthut ïa ka ïaid ka ïeng jong ki kali bad kiba lah ban ïalam sha ka jingtyngkhuh kali.
Namarkata, u Sadhu u la ai hukum ban khang ïa ka jingbuh ïa ki khyrdop lum khajna/pisa be-aiñ lane ka jinglum pisa jubor ha baroh ki surok – National Highway, State Highway bad ki surok bakongsan ha East Khasi Hills, bad u la pynjari ïa kane katkum ka kyndon 144 CrPC.
Kino-kino kiba pynkheiñ ïa katei ka hukum kin shah leh da kaba tyngeh katkum ka aiñ, la ong u Sadhu.
