Nongstoiñ, Jymmang:
Kum shi bynta ban ai jinghikai ïa ki samla pule ba kin nang ban pynkhreh ïa ka eksamin JEE bad NEET, ka State Council of Science Technology and Environment (SCSTE) Meghalaya ha ka Sngi Balang ka la ïoh ban pynlong ïa ka jingïalang ai jinghikai ïa ki khynnah pule klas XII na ka thaiñ Nongstoiñ ha West Khasi Hills District.
Ïa katei ka jingïalang ai jinghikai la ïoh ban pynlong hapoh Vanni’s Hall St. Peter’s Pyndengrei ha kaba ki la don haduh kumba 40 ngut ki khynnah kynthei bad shynrang kiba shong klas XII (Science) na ki skul bad kolej bapher-bapher ka thaiñ kiba la wan ban ïashim bynta.
Katei ka projek kaba la tip ruh kum ka Meghalaya Star 30 bad ka jingthmu jong katei ka projek ka long ba lyngba ki prokram ai jinghikai kylleng ka Jylla yn jied kumba 30 ngut ki samla pule kiba kynsai tam na ka bynta ka JEE (Joint Entrance Exam) bad 30 ngut na ka bynta ka NEET (National Eligibility cum Entrance Test).
Ka samla Sngewhunshisha Nongrum ba pule klas XII na Sibsingh Memorial Government Higher Secondary School Nongpyndeng bad u Naame Bankhraw Lyngkhoi, klas XII na ka Anderson Higher Secondary School Nongstoiñ haba kren bad u nongthoh khubor ki la pynpaw ba ki la ïoh jingmyntoi shibun lyngba ki jinghikai na u Dr. Varun ha kaba ki la ïoh mynsiem ban sngew shlur namar ki la sngewthuh kumno ban pynkhreh ïa kitei ki eksam kiba kham eh bad kumno ruh ban ïeng ïaleh haba kynduh ïa ki jingeh ha ka jingïaid lynti jong ka pule puthi khamtam kum ki nongkyndong kim pat ju tip kumno ban ïaksaid bad ban ïeng.
