Nongstoiñ, Jymmang 16
Ka ïingbishar Special Judge (POCSO) Nongstoiñ ka la rai pynrem ïa u Beldingstar Khardewsaw halor ka jingdonkti jong u ha ki kam batbor bad ha kajuh ka por ka la daiñ kuna ruh ` 10,000.
Ki pulit ka thanat Nongstoiñ ha ka 5 tarik u Kyllalyngkot 2021, ki la ïohpdiang ïa ka jingujor halor ka jingkynnoh ba uwei u briew uba la tip kyrteng kum u Beldingstar Khardewsaw (40 snem) u la thmu ban leh be-ijot ïa kawei ka khynnah kaba dang rit ka rta kaba la jia ha ka 4 tarik u Kyllalyngkot, 2021.
Na ka liang ki pulit hadien ba ki la ïohpdiang ïa katei ka jingujor ki la pynrung mukotduma (register case) ïa katei ka jingjia hapoh ka thanat Nongstoiñ katkum ka mukotduma kaba 02(01)2021 da kaba pynngat ruh hapoh ki kyndon 9(m)/10 jong ka POCSO Act.
Ïa kane ka mukotduma la shim tohkit da ka WPSI Nongstoiñ Women Police Station ka Kong A Thongni bad hadien katto-katne por la kem noh ïa utei u briew uba la shah kynnoh thmu leh be-ijot ban pynlong ïa ka jingtohkit kaba bniah bad ïa ka mukotduma la ‘chargesheet’ da ka ophisar kaba tohkit ïa katei ka kam (Investigating Officer) hapoh ki kyndon 9(m)/10 jong ka POCSO Act.
Na ka liang jong ka ïingbishar Special Judge (POCSO) Nongstoiñ ha ka 6 tarik Jymmang 2024 ka la ai ïa ka jingbishar hadien ba ka la peit thuh bad peit bniah ïa ki sakhi-sabut lyngba ka jingtohkit, ka ïingbishar ka la pyllait noh ïa u Beldingstar Khardewsaw na ka kyndon 9(m) jong ka POCSO Act ban shah pynshitom hapoh ka kyndon 10 jong ka POCSO Act, namar ka jingbym lap ïa ki sakhi-sabut kiba biang.
Hynrei ka ïingbishar Special Judge (POCSO) Nongstoiñ, ka la lap pat ba u Beldingstar Khardewsaw u dei uba la donkti ban pynkheiñ ïa ka kyndon 11(i) jong ka POCSO Act, ban shah pynshitom hapoh ka kyndon 12 jong ka POCSO Act. Kumta ka ïingbishar ka la rai pynrem da kaba set patok ïa u Beldingstar Khardewsaw ha kaba u la pyndep lypa ïa katei ka jingshah pynsaja ha ki por ba u dang don hapoh ka jingshah tohkit, bad u hap ruh ban siew ïa ka kuna kaba ` 10,000 bad lada um lah ban siew ïa katei ka kuna un hap shong patok biang sa 1 bnai.
