Nongpoh, Jymmang 16
Ha ka Sngi Palei ka la mih ka thma ktien kaba jur hapdeng ki nongshong shnong ka Maikhuli bad ki nongshong shnong ka Assam, kaba la jia ha ka thaiñ khappud jong ka Ri-Bhoi bad Assam.
Kane ka jingmih ka jingïania bad thma ktien kaba jur ka la long hadien ba ki nongshong shnong ka jylla Assam ki la khang lynti bad pyrshah ïa ka jingïaid jong ki trok kit maw kiba la wan na kawei ka par maw kaba la tip kyrteng kum ka Sureka Enterprise kaba don ha ka shnong Maikhuli, Ri Bhoi District.
Katkum ka tyllong khubor ba la ïoh lum, la ïathuh ba kane ka jingkhang lynti da ki nongshong shnong ka jylla Assam ïa ka jingïaid ki trok ka dei namar ba ka la pynjulor shikatdei ïa ka surok bad wanrah ruh ïa ka jingshlei um ha ka por slap.
La ïoh jingtip ruh ba ha shwa kane ka jingkhang lynti, ki nongshong shnong ka Assam ha kitei ki thaiñ khappud ki la buh ruh ïa ka jingdawa sha katei ka kompani (ka Sureka Enterprise) ba ka dei ban maramot ïa katei ka surok kaba la jot na ka daw jong ka jingïaid ki kali kit maw na katei ka par maw. Ha kine khyndiat bnai ba la dep, katei ka kompani ka la dep ban maramot da ki kynja maw block, hynrei namar ka jingïaid jong ki kali kit khia bad ka jinghap slap, katei ka surok ka la jot biang kumjuh kaba la pynbitar ïa ki nongshong shnong ka Assam.
Ha kane ka sngi, tang mar shu ïoh jingtip halor katei ka jingkhang lynti jong ki nongshong shnong ka Assam ïa ka surok, ki nongshong shnong jong ka Maikhuli da ka jingbitar lep ki la mih paidbah ban leit sha katei ka jaka bad ka la mih ka jingpyni nia kaba jur hapdeng kitei ki ar kynhun kaba la jan poi ruh shaduh u pud jong ka jingïaumsnam.
Tang shu ïoh jingtip halor katei ka jingïakajia, ki pulit ka jylla lyngba ka Pilangkata Border Outpost lem bad ki pulit ka Assam na Basistha bad Jorabat ki la hiar mar-mar sha katei ka jaka ban tem ïa ka jingkajia bad hadien ka jingwan poi jong ki Majistor na baroh ar tylli ki jylla, la lah ban tem noh ïa katei ka jingkajia bad ki nongshong shnong ka Assam ki hap ban pyndem noh da kaba shah ïa kitei ki trok ba kin ïaid kumba ju long.
Na ka liang ki Majistor jong baroh ar jylla ki la hukum ruh ba ym dei ban shna kino-kino ki jingpynwit ïa ka leit ka wan ha katei ka jaka naba ïa kane yn pynbeit ha ka kyrdan jong ki Deputy Commissioner jong ar tylli ki district ka Assam bad Meghalaya kiba dei khmih ïa kitei ki jaka.
