Jowai, Jymmang 16
Hadien 13 bnai kynthih ki nongrep ka shnong Khanduli kiba don pynthor, hali ha shnong Karbi ha Assam kin sa ïohlad ban leit rep biang naduh ka 21 tarik Jymmang 2024.
Kane ka la urlong ha ka jingïakynduh lang jong ka Dorbar Shnong Khanduli bad ka Soching Amring Border Development Committee (SABDC) ha BOP jong ki pulit Assam ha Khanduli, West Jaiñtia Hills Distrit ha ka 16 tarik Jymmang. Ïa ka Dorbar Shnong Khanduli la mihkhmat da u Waheh Shnong Bah Yooshida Nongspung bad kiwei kiwei ki nongïalam kynthup ïa u MLA barim u Bah Draison Kharshiing katba ïa ka SABDC la lamkhmat da u President u Agustine Hanse nalor kiwei.
Katei ka jingïakynduh lang ka la long ha ka jingkhmih jong ki Border Magistrate na West Jaiñtia bad West Karbi Anglong kata u Dr. P Langbang bad Alamgir Laskar.
Katei ka jingïakynduh lang ka la mynjur ban ailad ïa ki nongrep jong ka Khanduli ban sdang biang ïa ka jingleit rep jong ki hadien ba ki trai khyndew kin leit pyni ïa ki kot pata jaka sha ki waheh shnong jong ki shnong Karbi kiba ki jaka puta ki don. Shuh shuh ki nongïalam jong ka SABDC ki la ïathuh ba kin sa leit ai jingtip sha ki waheh shnong bad ki nongshong shnong jong ki 32 tylli ki shnong Karbi kiba ki jaka puta jong ki Pnar ki don.
Ka jingïakynduh lang kala rai ban aiti sha ka sorkar Meghalaya bad ka sorkar Assam ban rai haei ban pynïeng biang ïa ka khyrdop ne ka Entry Tax Gate lum khajna jong ka KAAC kaba la shah weng ha u bnai Nailar (August) 2023.
Ka jingïalang ka la rai ba baroh ki arliang mamla kin pdiang ïa ka rai ban sa shim da ki sorkar jong ka Meghalaya bad Assam. Ka jingïakynduh lang ka la rai ba naduh mynta ka leit ka wan jong ki paidbah bad ki kali sha baroh artylli ki jylla kala plie bad ka Dorbar Shnong Khanduli kan pynthikna ïa ka jingshngaiñ jong ki Karbi kiba wan sha Khanduli bad kiwei de ki shnong Pnar katba ka SABDC ruh kan pynthikna ïa ka jingshngaiñ jong ki Pnar kiba leit sha Assam.
Ka jingïalang ka la rai ba kino-kino ki jingshna ne projek bathymmai ne ki jingthung dieng kin ym sdang khlem pat dep ka jingïaleit jurip lang jong ka Assam bad Meghalaya.
Shuh shuh ka jingïalang kala rai ba ka dorbar shnong Khanduli bad ka SABDC kin nym pynthut ïa kino kino ki kam pynroi ha ki khappud bad kin ieh ha ka jingstad jong ka sorkar Assam bad Meghalaya.
Ka jingïalang kala rai ban khang ïa ka jinglum palat pud ïa ki jhur ki jhep ha ki khlaw ki btap kum u lungsiej, ka jingsiat pathar ïa ki sim ki doh mrad bad khwai dohkha da kaba pyndonkam ïa ki kynja pynbthei.
Ka jingïalang ka la rai ba ki Pnar kiba don jaka puta ha Assam kin register ïa ki jaka puta jong ki bad siew khajna sha ka Assam bad ki Karbi kiba don jaka ha Meghalaya kin register ïa ki jaka jong ki sha Meghalaya bad siew khajna sha Meghalaya. Ka jingïalang kala rai ruh ba ka shnong Khanduli bad ka shnong Am-ih kin ïa shong pynbeit noh ïa u pud u sam jong ki.
