Shillong, Jymmang 16
Hadien ka kynrum-kynram kaba mih ha ka rukom pynïaid ïa ka eksamin Common University Entrance Test (CUET) ba la pynïaid da ka National Testing Agency(NTA) ha kawei na ki jaka thoh eksam kaba don ha nongbah Shillong kata ha skulbah North Eastern Hill University (NEHU) ha ka 15 tarik u Jymmang 2024, na ka liang u MLA ka Mawlai Constituency, u Bah Brightstarwell Marbaniang ha ryngkat bad u dkhot ka Media Cell ka Voice of the People Party (VPP), u Dr. Rusievan Shangpliang bad ki dkhot ka seng ki la leit ban hiar dalade sha katei ka jaka thoh eksamin ha ka janmiet jong katei kajuh ka sngi ban khmih bad ïakren bad kiba shimti ban pynïaid ïa katei ka eksamin ha NEHU halor kane ka jingleh thurmur jong ka NTA.
Ha katei ka jingleit hiar dalade sha katei ka jaka thoh eksamin, utei u nongmihkhmat ka Mawlai u la la ïoh ban ïakren bad ki nongpynïaid ïa katei ka eksamin ha kaba u la ong ruh ba kum kane ka jingeh kam dei shuh ban dang ktah bad pynjynjar ïa ki samla pule ka jylla nangne shakhmat.
U Bah Brighstarwell u la ong ba katkum ka jingïathuh bad kiba la shimti ban pynïaid ïa katei ka eksam ha NEHU ka long ba ka jinglah jong ki ban shim ïa ki khynnah ka long kumba 2000 ngut hynrei ka jingwan jong ki khynnah ban ïaleh ïa katei ka eksam ha katei ka jaka ka long haduh 4000 ngut.
U Bah Brightstarwell u la ong ba na ka liang ka seng ka da pynrem jur halor kane ka jingleh thurmur jong ka NTA bad kum ka seng ruh ka lah dep ban rah ruh ïa kane ka mat hapoh ka ïingdorbar thawaiñ ka jylla namar kum ka seng ka la dep ban sngewthuh lypa ba kane ka jingpynlong ïa kane ka eksamin kan sa ktah ïa ki khun samla ka jylla. Hynrei na ka liang u Myntri ka tnad pule puthi ka jylla, u Rakkam A. Sangma pat u la ong ba ka sorkar ka la leh ïa la ka jong ka kamram bad u la ïai ban ruh ba ka sorkar ka la long kaba la pynkhreh ban pynlong ïa katei ka eksamin hapoh ka jylla bad ba kan nym don satia kano-kano ka jingeh.
“Hynrei kumba ngi ïohi pat mynta kam long kumta, na ka liang jong nga, nga pynrem jur ïa ka sorkar kaba khlem shim khia ïa kane”, la ong u Bah Brighstarwell.
Shuh shuh u Bah Brightstarwell u la ong ba kane ka kynrum-kynram kaba la mih ka dei ruh na ka jingdkoh treikam ka NTA namar wat haduh ba ki khynnah samla ki la dei ka sngi ban thoh ïa ka eksamin jong ki ruh kim pat ïoh satia ïa ki Admit Card kaba la pynkhuslai mynsiem shikatdei eh wat ïa ki kmie ki kpa ruh kumjuh.
U la ong ba kum ka sorkar ka dei ban shim ka jingkitkhlieh ban ïakren halor kane ka jingeh bad ka NTA namar kum kine ki jingeh kim dei ban wan jia bad ba ki Admit Card jong ki khynnah kiba dei ban ïakhun ïa kane ka eksamin ruh ki dei ban pynbiang shitaïew ha shwa ka eksam bad ban pynbiang ruh ïa ki jaka thoh eksam ba ki khynnah ki dei ban hap thoh khnang ba kane ka jingeh kaba la dep ban mad kam dei shuh ban dang ïai jia nangne shakhmat.
“Ka sorkar ka dei ban shim khia bad kam dei ban shu long ‘niangkohnguh ba katba wan napoh Delhi ban shu pdiang beit hynrei ki don shibun ki jingduna khamtam lyngba kane ka National Testing Agency. Kam lah ban shu kheiñ sting kumne bad ban ïalehkai bad ka lawei ki khun samla jong ngi”, la bynrap u Bah Brighstarwell.
