Shillong, Jymmang 16
Ka Sorkar Pdeng ka la mang T. 324 klur ban pyllait noh ïa ka pisa kum ka bai thied tiar (material components) kiba pyndonkam ban pyntrei ïa ki projek hapoh ka skhim bylla sngi Mahatma Gandhi National Rural Employment Guarantee Scheme (MGNREGS) ha kane ka Jylla.
Ka Sorkar Pdeng ka la pyntip ïa kane sha ka Sorkar Jylla ha ka Sngi Palei lyngba ka shithi kaba la phah da ka tnat Rural Development na Delhi.
Dang shen, u Myntri Rangbah u la thoh da ka shithi Demi Official (DO) sha u Myntri ka tnat Rural Development ka Sorkar Pdeng ha kaba u la pynpaw ïa ki jingeh bad ka Jylla ka ïakynduh namar ka jingsahteng ban pyllait ïa ka pisa ban thied tiar nalor ka jingeh bym pat dep lut kiba don ‘job card’ ban pynïasoh ïa u Aadhaar bad ka jaka kynshew pisa.
U Principal Secretary ka tnat Community and Rural Development ka Jylla, u Sampath Kumar u la ïathuh ba na ka ? 324 klur, la mang T. 314 klur kum ka bai thied tiar bad T. 10 klur na ka bynta ka jinglut-jingsep kum ka jingsiew tulop ïa ki nongtrei bad kiwei ki jingpynïaid kam (administrative components).
U la ong ba ka bhah ba hap sei pisa lang da ka Jylla kum ka bai thied tiar ka long 75% na ka Sorkar Pdeng bad 25% na ka Sorkar Jylla.
U la ong ruh ba hadien ba la ïohpdiang ïa ka shithi ba la mang ïa ka pisa, kan ym slem shuh ban pyllait ïa ka pisa sha ka Jylla.
Hynrei u la ong ba kane kam pat dei ba la mang ban pyllait lut baroh ka pisa kaba sahteng, hynrei ka dang don kaba dang sah sa katto katne.
Kane ka pisa kaba la mang ban pyllait ka dei na bynta u snem 2023-2024 bad ka don ruh katto katne kaba sahteng jong u snem 2022-2023.
Da kane ka jingmang ka Sorkar Pdeng ban pyllait ïa ka pisa, ki Village Employment Council ha kylleng ki shnong kin sa ïoh ban pyndonkam na ka bynta ban thied tiar ban pyntrei ïa ki projek bapher-bapher hapoh ka skhim MGNREGS.
