Shillong, Jymmang 16
U Publicity Secretary ka Kur Warjri, Bah Raphael Warjri u la ong ba katkum ka jingpynbeit u mynbarim lada u shynrang Khasi u ïoh lok da kawei ka jaidbynriew kata lada dei China um lah ban pynlong Khasi ïa ka da kaba ai jait sha u shynrang hynrei hap ban tangjait ïa ka, khnang ba ki khun kiba mih na u symbai jong u shynrang Khasi kin kylla Khasi noh.
Haba ïakren kyrpang bad u Bah Raphael ha shlem treikam jong u ha Shillong, u la ong ba ka rukom leh mynbarim ka long ban kdup ïa baroh ban pynkhlaiñ ïa ka jaidbynriew namar lada ka kynthei ka ïoh lok da uwei u jaidbynriew haba ka ai jait sha lade ïa ki khun kaba mut ki dei hi ki Khasi. Hynrei ka kynthei kaba la ai jait noh sha u kpa uba dei na kawei ka jaidbynriew kata ki khun kim dei shuh ki Khasi.
Halor ka jingrai ka tnat Social Welfare ban pynduh Schedule Tribe (ST) ïa ki Khasi kiba ai jait kpa, ïa kane um lah ban ong eiei namar kane ka dei ka rai jong ka Khasi Hills Autonomous District Council.
U la pynkynmaw ba ka don kawei ka jaidbynriew rit paid ki Nayar ha jylla Kerala haba mynshwa ki ai jait sha ka kmie ki ïoh Schedule Tribe bad hadien ki la pynkylla ban ai jait noh sha u kpa ki shah pynduh Schedule Tribe namar la kheiñ ïa ki briew kiba la kiew ha ki liang baroh.
Kumta u la kyntu ïa ka jaidbynriew ba wat leh shongshit ban shim jait sha u kpa ïoh jia shah pynduh Schedule Tribe ïa ka jaidbynriew Khasi.
U Bah Raphael u la ong bym lah ban pdiang ba ha ka dustur u Khasi yn duh noh ban khot meikha namar u shynrang u dei uba ai symbai bad ka kynthei dei ba kha ba pun.
U la ong biang ba u symbai jong u shynrang u wan na ka kmie ba kha takadaw hap burom beit ïa ka meikha.
U la ai nuksa ba kiwei ki jaidbynriew rit paid ha India wat lada ki ai jait kpa ki dang ïoh Schedule Tribe namar naduh ba sdang ki ai jait kpa, hynrei ka jaidbynriew kaba pynkylla khongpong hadien kin duh beit Schedule Tribe.
