Shillong, Jymmang 16
Na ka jingkit tam ïa ka dewbilat da ar ngut ki nongñiah trok na ka karkhana Amrit Cement Plant kaba don ha Umlaper, East Jaiñtia Hills, ki nongpynïaid kane ka karkhana ki la shem ba ha ki lai snem, ka la don ka jingkit ei ïa ka dewbilat kaba shongdor haduh T.19.45 klur.
Katkum ka khubor ba la ïoh lum na ki pulit, la ong ba ha ka 15 tarik Jymmang, u Mahavir Prasad Sharma jong ka Amrit Cement Plant, u la ujor ba ha ka 8 tarik Jymmang, u Riki Palaong, uba dei u nongñiah jong ka trok AS-01PP-8882, bad uwei pat, u Ala Uddin, uba ñiah ïa ka trok AS-01PP-8885, ki la mih na katei ka karkhana ha kaba ki la kit tam ïa ka dewbilat da mar 50 bad 57 byrni.
Ha ka jingujor, u Sharma u la ong ba ïa kane ka jingkit tam ïa ka dewbilat la leh ha ryngkat ka jingdonkti lang jong ki nongpynïaid ïa kawei ka jaka thew lane ‘weighbridge’.
Ym tang katta, u Sharma u la kam ruh ba ha ki lai snem kiba la leit noh, ka dewbilat kaba shongdor haduh T.19.45 klur ka la shah tuh lane shah pyndonkam bakla, bad kiba donkti ha kane ka kam ki dei ki nongtrei jong ka karkhana, nongbylla, kontraktor, nongtrei ha ka ‘weighbridge’, nongtrei kiba don ha ka tnat ban die bad pynpoi dewbilat, bad ki nongñiah trok.
