Tura, Jymmang 16
Ka Kur Chambugong bad Tegite na Tura ki la ai da ka ejahar halor ka jingkhlad noh jong kawei ka samla, ka Diana Dimre Ch Marak, ïa kaba la kynnoh ba ka la phasi ïalade, bad kine ki Kur ki la kynnoh ba ka jingkhlad jong ka, ka dei namar ka jingdon ba leh sniew bad ym ba ka la dkhat hi ïa la ka jingim.
Lah ban kdew ba ïa ka Diana, kaba dang pule ïa ka Civil Engineering (Second Year) ha Shillong Polytechnic, Mawlai, la lap ba ka la sdien phasi ha ka Hostel kaba don ha kane ka shlem pule hi. Ïa ka met jong ka la lap ha ka 6 tarik Jymmang.
Wat la ka jingsuba ka dei ba katei ka samla ka pynïap hi ïalade, hynrei kitei ki Kur ki la kynnoh ba kam long satia kumta.
“Ha ka 7 tarik Jymmang, katba ngi dang pynkhuid ïa ka met ha shwa ban tep ïa ka met kaba sah, ngi la shem ba ki la don bun ki dak mong ha ka met khamtam ka dak ing ha ryndang, dak mong ha baroh ar tylli ki kti, dak mong shadien u ryndang bad ha ka kti kamon,” la ong kitei ki Kur ha ka ejahar ba la ai ha ki pulit ka thanat Tura.
Kitei ki Kur ki la ai lang bad ki dur ki dar jong kita ki dak mong kiba la don ha ka met jong katei ka samla.
Nalorkata, ha kata ka ejahar, la ong ba ka Diana, ha ka 5 tarik Jymmang, ka la pyntip sha ka kmie bad u kpa jong ka ba ka la don ka jingïania bad kiwei pat ki samla pule halor ka jingbym ïaid beit ka jingïalang ban ai khublei ïa ki samla pule kiba la dei ban mih noh na katei ka shlem. La ong ba kita ki samla ba pule lang ki la kynnoh ïa ka halor kata ka jingbym ïaid beit namar dei ma ka kaba la lum pisa bad ban pynïaid ïa ka jingïalang.
Shuh shuh ha katei ka ejahar, la kynnoh ba katei ka samla ka la mad jingeh namar ki para ba ïa pule lang, bad ka la pyntip ruh ba ki don san ngut ki samla pule kiba dei ki kynthei kiba la byrngem byrsit ïa ka.
Nalorkata, kitei ki Kur ki la ong ha ka ejahar ba ka ïa met kaba sah jong katei ka samla la pynhiar na ka ‘Grill’ jong ka jingkhang ïit khlem da don lang ki bahaïing hasem ban sakhi bad kane ka long pyrshah ïa ka aiñ.
“Ka jaka ba la ong ba ka phasi ïalade ka long kynjang bha. Dei sa tang kiba la tbit ban kiew ha ki jaka ba kynjang ki ban lah ban kot khlem da ïarap mano-mano. Kam lah satia ka ban long ba ka samla kaba 5 phut ha ka rynïeng kan kiew sha ka jaka ba kynjang bad ban phasi ïalade,” la ong kitei ki Kur.
Ha kajuh ka por, ki la pyntip ba ym pat don mano-mano ki nongpynïaid jong katei ka shlem pule Shillong Polytechnic kiba la pyntip ne ïakren bad u kpa jong katei ka samla haduh mynta.
“Ym don satia ki briew na ka shlem pule lane ki nonghikai kiba la wan synran lang ïa ka met ha ka por ba la aiti ha ka 6 tarik Jymmang. Ym don hi ruh wat tang kawei ka shithi sngewlem sha ki bahaïing hasem na ki bor ba dei khmih jong ka Polytechnic,” la bynrap kitei ki Kur.
Namarkata, kitei ki Kur ki la dawa na ki pulit ba kin pdiang ïa katei ka jingujor bad ban sdang ïa ka jingtohkit khnang ba kito kiba donkti ha katei ka jingjia kin shah kem bad ba katei ka samla kaba la khlad bad ki bahaïing hasem jong ka, kin ïoh ïa ka jingbishar kaba hok.
