Shillong, Jymmang 16
Ka kynrum-kynram ha kaba ïadei bad ka eksamin CUET kaba la pynkordit ïa ki samla pule kiba la leit ban ïaleh ïa kane ka eksam ha NEHU ha ka 15 tarik Jymmang 2024, ka pynpaw shai kdar ba kam shym don satia ka jingpynkhreh lypa bad jingkitkhlieh da ka National Testing Agency (NTA), ka Sorkar Jylla bad ka NEHU, la ong ka seng Voice of the People Party (VPP) ha ka Sngi Palei.
Ha u kyrwoh khubor, u Dr Rusievan Shangpliang, uba dei u dkhot ka VPP Media Cell, u la ong ba ka long kaei-kaei kaba sngewsih ba ki samla pule kin hap ban mad ïa ka jingkordit namar bym don ki bor pynïaid ki ban peit ban khmih. Ki samla pule ki la hap ban ap haduh jan lai kynta na ka por ba la buh ba kin ïoh ban thoh ïa kane ka eksam, u la bynrap.
Nalorkata, u la pynkynmaw ba ka VPP ka la dep maham lypa ïa ka sorkar jylla halor kane ka kam shabar bad hapoh jong ka Ïingdorbar Thawaiñ. Tangba, u Dr Shangpliang u la ong ba ka long pat kaba sngewdiaw ba ka sorkar jylla khamtam eh u Myntri ka tnat pule puthi kim treh ban pyrkhat lem ïa ka lawei ki samla pule, hynrei ki pyrshang pynban ban pynkylla kam saiñ hima ïa kane ka kam.
Shuh shuh, ki Principal jong ki kolej, kumba la paw ha ki lad pathai khubor, kim shym la ïohpdiang ïa kino-kino ki jingbatai bniah na ka sorkar jylla lane na ka NEHU halor ka rukom pynlong ïa ka CUET, la ong u Dr Shangpliang da kaba bynrap ba kane ka pyni ïa ka jingbym kitkhlieh na ka liang ki bor pynïaid kat haduh ba ki samla pule ki la shah pynlong ‘langkñia kha-ma-kha.
“Ngi la ïoh jingtip ruh ba kiba bun ki samla pule na ki jaka nongkyndong kiba ym shym lah satia ban pynrung kyrteng ïalade (register) ha ka CUET na ka daw ka jingbym ïoh jingbatai, jingtip ba bniah bad jingbtin lynti na ki bor ba dei peit,” u la ong.
Kumta, ha kaba ïadei bad kane ka kam, ka VPP ka dawa ba ka NEHU bad ka sorkar jylla kim dei ban pynshong nongrim ïa ka jingpynrung kolej ïa ki samla pule na ka CUET, hynrei ba ïa ka jingpynrung kolej dei ban pynshong nongrim katkum ka jingleh ka jong ki (pass) ïa ka Klas 12.
