Shillong, Jymmang 16
Ka Sorkar Jylla kan dawa na ka National Testing Agency (NTA) ban pynlong biang ïa ka eksamin Common University Entrance Test (CUET) namar ka jingbym ïaid beit ka rukom pynlong ïa ka eksamin ha kaba ki la don ruh ki samla pule kiba duh ban thoh ïa kane ka eksamin kynthup ruh ïa kito kiba khlem lah ban pynrung kyrteng na ka bynta kane ka eksamin.
Ïa kane ka rai la shim hadien ba u Myntri Rangbah lem bad u Myntri ka tnat pule puthi u Rakkam A Sangma lem bad kiwei kiwei ki ophisar ki la don ha ka jingïalang ha Secretariat ha kaba la ïakren ïa kiba bun ki mat halor ka pule puthi ha kane ka Jylla.
Ki ophisar na ka skulbah North Eastern Hill University (NEHU) ruh ki la wan sha Secretariat bad shong lang ha ka jingïalang kaba pynïaid da u Myntri Rangbah hadien ka jingbym ïaid beit ka eksamin CUET ha NEHU ha kaba la donlang ruh u Coordinator jong ka NTA.
U Rakkam u la ïathuh ba ka Sorkar Jylla ka la rai ban thoh mar-mar sha ka NTA ban pynsngew halor ka jingthurmur ka eksamin CUET khamtam ha skulbah NEHU ha kaba ka rukom pynkhreh ban pynlong ïa ka eksamin ruh la shu leh kyrkieh bad pynkhreh ha ka minit kaba khatduh.
U la ong ba u Myntri Rangbah u la shim khia ïa kane bad yn ïakren ruh bad ka Sorkar Pdeng nalor ka NTA.
U Rakkam u la ong ba yn sa thoh shithi ban kyrpad ba kito ki samla pule kiba ïakhun ïa ka CUET kin ïoh pule ha NEHU hi bad ban ailad ruh ba kito ki samla ka Jylla kin ïoh pule ha ki kolej kiba ïasoh bad ka NEHU.
U la ong ba ki don ruh ki samla pule kiba khlem lah ban pynrung kyrteng ban ïakhun ïa ka eksamin CUET bad dei na kane ka daw ba donkam ban kyrpad ruh ban pyllait biang ïa ka Meghalaya na ka CUET.
Shuh shuh une u Myntri u la ong ba namar ka CUET ka pynmih jingeh ha Jylla, ka long kaba donkam ban don noh ka skulbah jong ka Jylla ha kaba kiba bun ki kolej kin ïasoh bad ka skulbah kaba dei jong ka Jylla da kaba ai nuksa ïa ka Captain Williamson Sangma State University.
Haba kylli halor ka jingshim jingkitkhlieh ïa kane ka jingeh kaba la mih namar ka CUET, u Rakkam u la ong ba ka NTA ka dei kaba pynlong ïa ka eksamin bad khlem pyntip sha ka Sorkar Jylla bad ki bor ba dei khmih ïa ki district ban ïarap pynpeit lang ïa ki jingdonkam kum ka jingïaid beit ki kali bad ban don kham bun tylli ki jaka thoh eksamin bad ka jingbuh ïa ki bor pahara.
Hynrei u la ong ba ka NTA ka shu pyntip ha ka khyllipmat kaba khatduh ban pynlong ïa ka eksamin CUET ha NEHU ha kaba ki don kumba 4000 ngut ki samla pule kiba dei ban thoh eksamin CUET.
Kumta u la ong ba ka Sorkar Jylla kan thoh biang sha ka NTA bad sha ka Sorkar Pdeng halor kaei kaba la jia khamtam ka jingdonkam ban pynlong eksamin biang ha Meghalaya bad ban pyllait shwa ïa ka Jylla lada long kaba lah.
