Shillong, Jymmang:
Ka Sorkar Jylla ka la thaw ïa ka Committee kaba kyrpang na ka bynta ban peit ban khmih bad wanrah ka jingpynbeit ryntih ïa ka rukom treikam jong lai tylli ki District Council ha kane ka Jylla. Ïa kane ka committee yn khlieh da u Chief Secretary u Bah DP Wahlang ha ryngkat ki ophisar ka District Council kum ki dkhot ha ban kdew bad btin lynti ha ka jingtreikam.
Ka jingthaw ïa kane ka Committee la rai ha ka jingïalang kaba la long hapdeng u Myntri Rangbah u Conrad K Sangma, u Symbud Myntri Rangbah u Bah Prestone Tynsong uba peit ïa ka tnat District Council Affairs nalor ki Chief Executive Member bad Executive Member, MDC na ki lai tylli ki ADC.
Kane ka Committee kan ïarap ruh ïa ki ADC ban pyni ki lad bad jingkdew ban pynbha ha ka rukom treikam ka ban wanrah jingpynkylla nalor ki lad ki lynti ban nym tlot ka pla tyngka bad jingpynmih pisa jong ki ADC.
Haba batai shaphang ki jingïakren bad ki rai, u Myntri Rangbah u la ong ba kane ka jingïalang ka long ban ïatai sani kumno ban pynlah ïa ki ADC ban poi sha ki thong kiba kynthup ïa ka jingkhmih bha ïa ka rukom pynïaid kam bad ki kyndon (Rules) bapher bapher, ka jingpynkhlaiñ ha ka liang ka pla tyngka bad ban pyllait lut ïa ki Bill ba dsng sahteng kiba la mynjur da ki Ïingdorbar jong kine ki lai tylli ki ADC.
U la ong ba ha ka jingïalang la wanrah ïa ki jingpruid dak ban kdew lynti (road map) khamtam ban pynkhlaiñ ïa ka pla tyngka ha kaba ka Committee kan sa iakynduh bad ïakren khamtam ha ka liang ka pisa tyngka jong ki ADC.
U la kren ruh shaphang ka jingthung nongtrei kaba khlem ïahap shuh ha ki ADC kaba ktah pynban ïa ka rukom treikam namar ki la bun palat katba u kdew ia ka nuksa jong ka KHADC kaba don kumba 800 ngut ki nongtrei.
Kumta u Myntri Rangbah u la bthah ïa ki ADC ba kin thung da ki riewshemphang khnang ban thaw ki lad ki lynti kumno ban nang pynkhlaiñ ha ka jinglad ki ADC ban pynmih pisa bad jinglum khajna katkum ka jinglong ka rukom treikam bad pynïaid kam ki ADC ha la ki jong ki jong.
U la ong ruh ba ki ADC ki dang dei ban ïoh ka song pisa na ka Sorkar Pdeng na ka bynta ki kam pynroi lyngba ka 15th Finance Commission bad ïa mynta hap ban pynbiang ruh ïa ki kot ki sla kiba donkam khnang ban ïoh shuh shuh ïa ka pisa.
