Shillong, Jymmang 17
Kum ka jingpynkhreh ban sdang ïa ka jaka pule doktor ha Shillong (Shillong Medical College), ka tnat ka koit ka khiah ka sorkar jylla ka la pynlong ïa ka jingai jingbatai ïa ki doktor kiba la don ka jingtbit kaba kham kyrpang (specialist doctor) khamtam kito ki ban shim ruh ïa ka bynta kum ki nonghikai ynda la sdang ïa ka jaka pule doktor.
Ha kane ka jingïakynduh hapdeng ki ‘riewshemphang bad ki doktor ka Jylla kaba la pynlong ha Courtyard By Marriott Hotel ha ka Sngi Thohdieng na ka bynta ban batai lypa ïa ki jingdonkam kiba bun kiba hap ban pynkhreh lypa ha shwa ban sdang ïa ka medical college.
Ki doktor kiba la kham shemphang kiba wan ban ai jingbatai ïa ki doktor ka Jylla, ki la pynpaw ba donkam ban ïoh pule doktor 300 haduh 400 ngut shisnem. Hynrei ha Meghalaya, ka jaka pule doktor ka don tang kawei kata ka North Eastern Indira Gandhi Regional Institute of Health and Medical Sciences (NEIGRIHMS) kaba lah ban pynrung tang 50 ngut ban pule doktor.
Uwei na ki nongkren uba ai jingkren halor ka jingpynmih ïa ki doktor ha ki Jylla bapher bapher man la u snem u dei u Dr Achal Gulati uba la batai shaphang ka jingdon ki Medical College ha India baroh kawei bad ka jingdonkam ban pynmih kham bun ki doktor na man la ki Jylla.
U Dr Gulati u la ong ba mynta ha India ki don 706 tylli ki Medical College bad da ki lak ngut ki doktor ki mih man la u snem.
Hynrei u la ong ba ha Meghalaya, ka don tang kawei ka jaka pule doktor, kata ka NEIGRIHMS, kaba lah ban phah pule tang 50 ngut katba ka jingdonkam doktor ha Meghalaya pat ka bun.
Haba kren shaphang ka jingpynkhreh ban sdang ïa ka Shillong Medical College, u la ong, “Ngi donkam ban don la ka jong ka Medical College bad ka jylla ka donkam la kumno-kumno kumba 300 haduh 400 ngut ki samla pule ban leit pule doktor.”
U la ong ruh ba ki samla ki donkam ban leit shabar ka Jylla bad ki dei ruh ban wanphai sha la ka jong ka Jylla ban ai ka jingshakri.
Kumta u la ai jingmut ba ka Medical College kaba thymmai ka donkam ïa ki doktor na ka jylla ban ai jingkyrshan khnang ban poi sha ka thong.
Ïa kane ka Orientation Program la pynlong na ka bynta ki doktor kiba la pyntbit kyrpang jong ka Jylla da ka jingthmu ban pynshai pynsngewthuh lypa ïa ki ha kaba ïadei bad ka kamram bad ka thong jong ka Medical College bad ka Hospital khamtam na ka bynta kito kiba hikai.
Ha kane ka sngi la ïoh ruh ka jingkren bad jingïaphylliew jingmut halor ka bynta jong ki doktor kaba khraw na ka bynta ban kyntiew ïa ka Medical College ha ka jylla.
Ka Sorkar Jylla ka la kut jingmut ban sdang noh ïa ka jingpule doktor lyngba ka Shillong Medical College da kaba sdang na ki jaka sumar kiba la don lypa kum ka Ganesh Das Government Hospital bad Shillong Civil Hospital da kaba pynbit pynbiang shuh shuh ïa ki jingdonkam katba dang pynkhreh ban tei da ka jaka pule bad hospital kaba thymmai.
