Shillong, Jymmang 17
Ka Hynñiewtrep Youths’ Council (HYC) Seng-kmie hapoh ka jingïalam u Vice-President, u Bah Donbok Kharlyngdoh ha ryngkat bad kiwei pat ki dkhot ka seng ha ka janmiet jong ka 17 tarik u Jymmang 2024 ka la leit ban khynra kynsan ïa ki jaka kiba kynrei bha ka jingkhaïi bad ka jingpyndonkam ïa u drok kaba don ha Ïew Jhalupara, Upper Mawprem.
Ka jingleit khynra kynsan jong ka seng sha katei ka jaka ka long ruh hadien ka jingïoh jingujor na ki paidbah nongshong shnong ba katei ka jaka ka la jyllei bha ka jingdie bad ka jingdih drok.
Kum ban shu kdew hangne, na ka liang ka HYC ka la trei borbah ban pynlong ka jingkhynra ïa ki jaka kiba kynrei bha ka jingdie bad ka jingkhaïi drok ha kylleng ka nongbah Shillong ha kine ki khyndiat sngi ha kaba ka la ïoh bat ïa bun ngut ki briew kiba dei ki nongkhaïi bad ki nongpyndonkam ïa u drok.
Ha katei ka jingleit khynra ka seng hapoh ka Ïew Jhalupara ka la lap ïa shibun ki jingdih pynbuaid bad ki tiar kiba kynthup naduh u kynja, ki thyrnia ba pyndonkam ban injek drok bad kiwei-kiwei.
Ha ka jingïoh kem ïa ki nongdih bad nongkhaïi la ong ba ki la don haduh 20 ngut tam ki khynnah samla ha kaba ki bun napdeng kine ki dei ki bar jylla suda bad nalor jong kine la don lang ruh uwei u riew rangbah.
Na ka met jong kine ki nongdih drok, ka seng HYC ka la ïoh ban kurup ïa ki tiar pynmynsaw kum ki wait, tyrnem, screw driver bad kiwei-kiwei ki tiar kaba la suba ba kine ki briew ki lah tuh bad thmu ban die tang ban ïoh thied drok bad kumjuh ruh la pyndonkam ha ka ban tuh ruh.
Na ka liang ka HYC ka la thang noh ïa kine ki drok kiba la ïoh kurup baroh ha kane kajuh ka jaka ha Upper Mawprem hakhmat jong kitei ki nongdih drok.
Shuh shuh ha katei kajuh ka janmiet khlem da shongthait ban rat dyngkhong ïa une u jingdih basniew uba la jyllei bha, na ka liang ka HYC hadien ba ka la dep ban leit khynra ha Upper Mawprem, ka la leit ban hiar biang sa sha ki thaiñ ka Ïew Anjalee ter-ter. Ha kane ka jingkhynra ka la lap sa ïa ki katto-kattne ki samla Khasi kiba la die bad ïashong dih drok habar jong ka dukan Mahari kaba don ha Motphran.
Ha ka jintalasi ïa kitei ki samla kiba don hajan ka Mahari, ka seng ka la ïoh ban sei na ki pla jong kine ki samla haduh 67 tylli ki klong ba thep ïa ki drok ha ryngkat bad ki thyrñia injek drok.
Ha ka jingïoh bat jong ka seng ïa uwei na kine ki samla u ba dei u nongkhaïi drok ha baroh ka nongbah Shillong bad u ba don 25 snem ka rta, u la ïathuh ba u ju die ïa u drok sha ki Khasi bad ïa kine ki drok u la ïathuh ba u ju thied na Garoline kaba don ha Laitumkhrah.
Haba kylli pat ba mano ba la ïalam lynti ïa u ban die bad ban dih drok, na ka liang utei u samla u la ïathuh ba ym don ba ïalam lynti ïa u hynrei ka dei tang ka jingmlien jong u hi bad ka jingngop palat jong u ha kine ki jait kam.
Shuh shuh utei u samla u la ïathuh ba shi klong u drok u shongdor T. 500 bad shiteng klong pat u drok u shongdor T. 250 bad u la ju khaïi shajan baroh ki jaka ka nongbah Shillong bad hashwa ka jingshah bat jong u ha ka seng, u la ïathuh ba u la dep ban die tang kumba T. 1,000 u drok.
