Shillong Jymmang 17
Ka kyrtong ka National People’s Party (NPP) na ka bynta ka ilekshon Lok Sabha na Shillong parliamentary konstitwensi ka Kong Ampareen Lyngdoh ka la ong lada jop ne rem ka Sorkar kan ïoh jingmyntoi na kane ka jinglong kyrtong jong ka namar ka la poi lut sha ki kyndong-kynshrot jong baroh 36 tylli ki konstitwensi MLA bad ka la tip kiei ki jingduna kiba ka Sorkar ka dei ban leh.
Ka Kong Ampareen ka la ong ruh ba kam treh ban mynjur bad kito kiba ong ba ka Jylla kam pat kiew shaphrang, namar ka jingshisha ka long ba ka Jylla ka la nang kiew.
Ka la ai nuksa ïa kiba bun ki jaka kiba la ïoh surok bad ka Sorkar ka la trei naduh ki snem kiba mynshwa haduh mynta bad la sakhi ïa ki kam pynroi bad ka jingnang kiew ka Jylla.
Ka Kong Ampareen kaba dei ruh ka Myntri ka Sorkar Jylla ka la ong ba kita kiba ong ba ka Sorkar kam leh eiei lehse ka dei kaba ki shu kren kai namar ka jingshisha ka long ba ka Jylla ka nang kiew bad ki paidbah ki la nang ïoh lad ban myntoi na ki lad jingsumar, jingpule, nalor kiwei kiwei ki jingmyntoi.
Ka Kong Ampareen ka la ong ba ka la ïohi ïa ki jaka ha kylleng naduh ba ka dang khynnah ha ka por u kpa jong ka kum u nongmihkhmat paidbah ha ki snem 1980, nangta ka la leit bad u Bah PR Kyndiah ha ka por ilekshon ha u snem 2004 nalor ka jingleit jong ka sha kylleng ki jaka ha ka por ba pynkhreh ilekshon u Bah Vincent H Pala ha u snem 2009 bad kum ka nongmihkhmat bad ka kyrtong ha kane ka ilekshon MP ka la poi sha bun ki jaka bad ïohi dalade.
Kumta kane ka Myntri ka la ong ba kaba sah mynta ka long sa ban ïakhun pyrshah ïa ki bor kiba pynsngewthuh bakla ïa ki paidbah la kumba ka Sorkar kam ju leh eiei.
Ka Kong Ampareen kam treh ban kren halor ka jingïakhun ilekshon jong ka bad ka la ong ba ki jinglum jingtip kiba leh da ki seng saiñ pyrthei ym lah ban shu ïathuh lut shabar.
