Shillong, Jymmang:
U Myntri Rangbah ka Jylla Conrad K Sangma u la ong ba ka jingdon jong ki Autonomous District Council ka long shisha kaba kongsan namar ki ïada ïa ki riti dustur bad kumta ka jingkylli ban pynduh noh ïa ki District Council hapoh ka Jylla, kan nym jia da lei lei ruh.
Halor ka jingkylli ba mih ki jingdawa ban pynduh ïa ki district council, u Conrad u la ong, ki district council ki dei kiba kongsan bha ïa ka Jylla namar ki ïada ïa ka snap kyrpang bad ïada ïa ka riti ka dustur, ka jingleh tynrai, ki spah u barim-bajah jong ka Jylla bad ki Jaidbynriew.
U la ong, “Kumta, namar ba ka rukom pynïaid kam long ha ka rukom kaba biang namar kiba bun ki daw, kane kam mut pat ba dei ban pynduh noh ïa ki district council lane ban shim noh.”
Lah ban pynkynmaw ba ha u snem 2015, u Bah Micheal Syiem u la ujor da ka PIL ha ïingbishar Meghalaya High Court ba tynjuh ïa ka jingïai bteng ban don ki lai tylli ki District Council da kaba kynnoh ba ki dei ki bor treikam ki bym ïahap shuh ban don hadien ba la ïoh ïa la ka jong ka Jylla kaba pura.
