Shillong, Jymmang:
Ka Khasi Students’ Union (KSU) ka la kyntu ïa u Myntri ka tnat Pule Puthi ka jylla u Rakkam A Sangma ba un shim khia noh mardor halor ki kynrum-kynram kiba la mih na ka jingpynlong ïa ka eksamin CUET ha skulbah NEHU, kaba la pynkulmar jingmut ïa ki khynnah ïaleh eksamin.
Kane ka jingkyntu ka KSU ka la long lyngba ka dorkhas ba la phah sha u Myntri ka tnat Pule Puthi ha ka Sngi Palei bad ha kajuh ka por ban pynpaw ïa ka jingsngewkhia halor ka jinglong-jingman kaba la mih na ka rukom pynïaid ïa ka eksamin CUET.
Ka Education Cell jong ka KSU ha katei ka dorkhas ka la ong ba ka long shisha kaba sngewkhia haduh katta-katta na ka jingmih ki kynrum-kynram kaba la sakhi ha ka por ba pynlong ïa ka eksamin CUET ha skulbah NEHU.
Ka dorkhas ka la ong ba kum ka seng kaba ïeng na ka bynta ka bha ka miat bad ka hok jong ki samla pule, kam sngew lah mutdur halor ka jingdkoh ka rukom pynïaid bad pynbiang ïa ki jingdonkam kaba la pynsyrtok shi katdei eh ïa ki khynnah ba leit thoh ïa katei ka eksamin.
Ka KSU ka la ong, ba ki samla kiba ïaleh ïa ka eksamin ki la hap ban ap da ki kynta khlem kano-kano ka jingbthah kaba biang ne kino-kino ki jingthoh ki ban kdew ne btin lynti ïa ki ban poi sha ki jaka thoh eksam. Ka jingkulmar jingmut ka la nang jur haba ki Admit Card kiba la ai da ka NTA ka la kdew ba ka jaka thoh eksam ka jong ki ka dei ha NEHU Cluster Building, hynrei ka NEHU ka la buh ar tylli ki jaka thoh eksam ha ka Non-Science bad Science Cluster Classrooms, khlem da pyntip ha ka por kaba biang ïa kiba ïaleh ïa ka eksam ha kaba ha kano ka Hall kin hap ban shong katkum u Roll Number ba la pynbeit.
Shuh shuh la ong ba ka jingpynslem ban pynlong ïa ka eksam ha ka sobjek English namar ka jingbym treikam ka Biometric System, ka la pynlong ïa ki samla pule ba kin hap shah slap bad ka la don ruh ka jingkhynñiat bad jingtynruh kaba la neh slem bha, kaba la pynlong ruh ïa bun ngut ki khynnah ban kyllon bad ban ïoh ïa ka jingsumar.
“Ka long kaba sngewlyngngoh ba ka eksam kaba dei ban long ha ka por 3 baje ym shim la lah ban pynlong ha kaba ki samla pule kila ïoh rung ha ka jaka thoh eksam ha ka por 5.15 janmiet hadien ba ki bor pynïaid ka NEHU kila ïoh jingbit na ka NTA ban pynlong ïa ka eksamin khlem da donkam shuh ban pyndonkam ïa ka Biometric Registration,” la pynpaw ka KSU.
