Shillong, Jymmang 17
Ka jingdheng kali naduh View Point Mawlai Mawïongrim kiba wan na Shillong bad shaduh Lad Umroi kiba wan na Ri Bhoi District ka lah ban nang bteng namar mynta ka kompani kaba maramot ïa ka jingkieng Umïam ka la dep khlong shiliang ïa ka surok rong khnang ban shna thymmai noh.
Kum ban shu pynkynmaw ïa kane ka jingkieng Umïam kaba pynïakhlad ïa ka Ri Bhoi District bad East Khasi Hills District la sdang ban maramot naduh u bnai Nohprah 2023 kaba la buh thong ban pyndep hapoh saw bnai. Pynban mynta ka por ka la ïaid 6 bnai ïa ka kam ym pat lah pyndep bad ka nang shim por shuh.
Ka jingslem ban pyndep maramot ïa kane ka jingkieng ka dei namar mynta la dep khlong shiliang ka surok khnang ba shiliang kin ailad ban ïaid ki kali bad ynda ki la dep maramot kin sa khlong sa shiliang ka surok.
Kane ka jingpynïaid shiliang ïa ki kali kiba wan na Shillong bad Ri Bhoi ka la pynsahkut da ki kynta ïa ki kali namar don ki sngi ki kali ba ïeng laiñ ka poi shaduh shaneng ka View Point Mawïongrim bad don ki por ba ki kali kiba wan na Ri Bhoi ki hap ban ïeng laiñ haduh Lad Umsaw.
La ïoh jingtip ba hadien ba la dep khlong lut ïa ka surok kin siang thymmai da ka dewbilat ne ki lah ban siang biang da ka surok ïa kane ka jingkieng bad ha kata ka por ym shah shuh ban ïaid ki kali na kane ka jingkieng.
Lada jia ba ym shah shuh ban ïaid kali na jingkieng Umïam ki kali baroh kin hap ïaid na Mawtawar shaduh Umrynjah ban poi shaduh Umroi.
Ha ka jingjurip U Nongsaiñ Hima, la ïohi ba ki pulit pynïaid kali ki ju pyllait ïa ki kali mar 15 minit shiliang lada jrong u laiñ.
