Shillong, Jymmang 17
Ka Khun Hynñiewtrep National Awakening Movement (KHNAM) ha ka Sngi Thohdieng ka la leit ban ïakynduh ïa ka Deputy Director ka Labour Commissioner jong ka Sorkar Jylla, ka Kong BM Nongrum ha ryngkat ka jingaiti ruh da ka jingthoh ha kaba ïadei bad ka bai bylla sngi jong ki nongtrei ‘Contractual’ ha ki tnat bapher-bapher kiba kynthup naduh ki Unskilled, Semi-skilled bad ki Highly skilled ha kaba ka dor bai bylla ka long kaba duna shaba palat.
Haba kren sha ki lad pathai khubor hadien ka jingwan ïakynduh ïa ka Deputy Commissioner, u Working President ka KHNAM, u Bah Thomas Passah u la ong ba ka dor bai bylla ba la buh da ka sorkar jylla ka long kaba duna shaba palat bad kam ïahap shuh bad ka rukom im ha ka jingkiewdor ki mar bam mar dih bad ki mar ki mat ha kane ka juk kaba mynta kaba la ktah shikatdei eh ïa ki longïing-longsem kiba duna ha ka ïoh ka kot.
“Na ka liang ka jong ngi, ngi la shim khia ïa kane namar ba kane ka la ktah lut ïa u babun balang, kiba bun hi ki paidbah kiba bylla ki dei ki nongtrei bylla sngi. Ki don ruh ki nongtrei ‘Casual’ kiba trei ha ki tnad sorkar bapher-bapher bad lada kim ïoh ïa kata ka jingsiew kaba biang lehse, kan long ka jingban khia ïa ka longïing-longsem jong kiba bun”, la ong u Bah Thomas.
U Bah Thomas u la ong ba ka jingsiew ka sorkar jylla ïa ka dor bai bylla sngi kumba long mynta sha ki Unskilled ka long T. 300 shisngi kaba la kyntiew pat sha ka T. 340, na ka bynta ki Semi-skilled pat ka long T. 380 shisngi bad bud pat sa ki Highly-skilled kaba long T. 420 shisngi.
Shuh shuh ka seng ka la ai jingmut ruh ïa ka Deputy Director halor ka dor kaba ïahap bad ka imlang ka sahlang ka ban pynmyntoi ïa ki paidbah babun balang da kaba kyntiew noh ïa ka bainong sngi lane ka ‘Minimum Wages’ jong ki nongbylla.
U la ong ha katei ka jingai jingmut sha ka tnat Labour, na ka liang ka seng ka la ai jingmut ba dei ban kyntiew ïa ka jingsiew sha ki nongtrei Unskilled na ka T. 300 sha ka T. 400 tam shisngi bad na ka bynta ki Highly-skilled ka dei ban tam ïa ka T. 700 shisngi khnang ba kan wanrah ka jingmyntoi na ka bynta ki nongtrei ‘Contractual’ kiba trei ha ki tnat bapher-bapher jong ka sorkar jylla.
U Bah Thomas u la ong ruh ba wat ki tnad treikam sorkar bapher-bapher ruh kim bud satia ïa ka jingpynbna kaba ju mih shisien hynriew bnai napoh ka ophis jong ka Labour Commissioner bad u la ong ba na ka liang ka seng lada ka lap ïa kum kine ki jingleh, ka seng kan sa ai noh da ka jingujor lyngba ka jingthoh shapoh ka ophis jong ka Labour khnang ba kin lah ba leh ïa kaba donkam.
U Bah Thomas u la ong ba ka sorkar ka dei ban shimkhia ïa kane ka jingdawa namar ki nongtrei bylla sngi ki dei u budlum ka ïoh ka kot jong ka jylla.
Na ka liang ka Deputy Director ka la ong ba kan sa shim ïa ki jingai jingmut jong ka seng bad na ka liang ka tnad kan sa pynmih ïa ka dor kaba thymmai.
