Shillong, Jymmang 17
U Acting President ka Synjuk Rangbah Kur ka Bri U Hynñiewtrep, Bah R.L Kharpran u la pynpaw ba um sngewïahap ba ïa ki khun yn ai lang ïa ka jait kpa bad jait kmie namar ha ka dustur Khasi la ai beit tang da ka jait kmie.
Halor ka jingmih ki kynhun ban shim jait noh sha u kpa, u Bah Kharpran u la ong ba lada mih ar kynhun kawei ka kynhun kan shim jait sha u kpa bad kawei ka kynhun kan shim jait sha ka kmie kan sa kulmar ïa ka rukom kheiñ kur kheiñ kha hadien habud. Kumta kumba la hikai da ki mynbarim kaba beit ka long ban shim jait beit sha ka kmie kaba pun kaba kha.
Namar kata, u la kyntu ïa ka Khasi Hills Autonomous District Council (KHADC) kaba bat ïa ka riti-dustur, ka dei ban shna ïa ki aiñ kiba don bniat ban suk ka pateng ban wan.
U la ïathuh ba ha ka jingïakynduh ka synjuk bad ka KHADC la ïakren halor ka shithi ba phah u Deputy Commissioner ka Ri Bhoi District uba la pan ka thup ki jait bad ki kur na ka KHADC shwa ban ai Schedule Tribe.
“Ha kane ka jingïakynduh ngi la ïakren ruh ban pynjanai ïa ka jingshim jait na ka kmie bad ngin sa dang ïakynduh biang khnang ba ngi lah ban pan jingmut na ki paidbah” u la ong.
U Bah Kharpran u la ong lada ki kñi ki dang donbor, ka ïing ka sem, ka jingkheiñ kur kheiñ kha ka dang khlaiñ namar ha ka jingïateh ktien u kñi u dei uba pynïaid, hynrei don u kñi u bym donbor shuh ka dei beit ka jingleh jong u shimet.
Nalor nangta, u la ong biang ba ka jingmih ki Khasi kiba ai jait sha u kpa kane baroh ka dei ka jingsngewmeng ka jong ki ban pynkylla ïa ka dustur kaba la buh da u mynbarim.
U la pynkynmaw ba ïa kane ka synjuk la seng ha ka por ba long CEM u Bah HS Shylla (bam kwai ha dwar u blei) kaba la kynjoh mynta la san snem namar la seng ban tehsong ïa ki kur khnang ban ïada na ka jingai jait sha u kpa.
