Shillong, Jymmang 17
Ka Khasi Students’ Union (KSU) lyngba ka Employment Monitoring Cell ka la kyntu ïa ki bor ba dei khmih ka koit ka khiah ban pynbna paidbah ïa ki ‘mark’ jong baroh ki kyrtong kiba la thep ïa ka kam ‘Staff Nurse’ khnang ba ka jingjied ïa ki kyrtong na bynta ka ‘Interview’ kan long kaba khuid ba suba.
“Ka seng ka kwah ban pynpaw ka jingsngewkhia halor ki jingkynnoh bapher-bapher na ka liang ki kyrtong kiba la thep ïa ka kam ‘Staff Nurse’ katkum ka jingpynbna ha ka 06.03.2024 – No. HSM/NS/18/ 2023/79315 ba la pynmih da ka ophis Director of Health Service, Shillong, Meghalaya,” la ong ki nongïalam ka seng ha ka shithi ba la phah sha ka ophis Director/ Addl. Director, Director of Health Services ka Sorkar Jylla.
Ki nongïalam ki la ong ba katkum katei ka jingpynbna, ka ophis ka la pynmih ïa ki jingkdew ban jied ïa ki kyrtong na bynta ka ‘Interview’ katkum ka jingwan shakhmat jong ki ne ‘merit’, hynrei kumba ka long, ki don bun tylli ki jingkynnoh na ka liang ki kyrtong (ki bym don ha ka thup kyrteng na bynta ka ‘Interview’) ba ka thup kyrteng ka long kaba thok bad kaba lah ban pynkhreh da ka jingtuklar jong ki briew kiba don ha ka bor – kiba don ha ki kyrdan bapher-bapher hapoh ka Sorkar bad ophis kumjuh.
“Ki don bun bah ki jingkynnoh ba ki kyrtong kiba la shah jied na bynta ka ‘Interview’ kim shym la lah ban kot ïa ki jingbuh kyndon na ka liang ka ophis, katba ki kyrtong ki bym shah jied ki don lut ïa baroh ki jingdonkam kiba ka ophis ka pan,” la ong ka seng.
Ka seng kumta ka kyntu ba khnang ban don ka jingkhuid bad jingshai ha ka thup kyrteng ki kyrtong kiba shah jied na bynta ka ‘Interview’ bad ban kiar na kino-kino ki jingkam jong ka jingshah liang ba dei bahaïing, dei ban pynmih ïa ki ‘mark’ jong baroh ki kyrtong kiba la thep ïa ka kam khnang ban pynshai ïa baroh ki jingartatien halor ka rukom thung kam kumjuh ban kiar na kino-kino ki jingbym biang haba ïadei bad ka jingjied ïa ki kyrtong.
“Ka seng ka kyntu ba ïa ki ‘mark’ ba la ïoh pdiang da ki kyrtong dei ban pynbna paidbah ha shuwa ban sdang ka ‘Walk-in-Interview’,” la ong ki nongïalam ka seng.
Ha kawei ka liang, haba pan jingshai la ka don ne em ka lad ban pynskhem kam hadien-habud ïa ki kyrtong kiba la shah jied na bynta katei ka kam kontrak, ki nongïalam ki la ong, “Lada ka lah ban long kumtei, ka seng ka kyntu ba dei ban pynsangeh shi syndon ïa kiba kum kine ki rukom, hynrei ban wanrah ïa ka jingthung kam ha ka rukom ba dei ban jied ïa ki kyrtong bad ka dei ban long katkum ka ekasmin lem bad kiwei-kiwei ki jingbuh kyndon kum ka jingshemphang ha ka kam.”
