Shillong, Jymmang:
Ka Lympung Ki Seng Kynthei ka pynpaw ïa ka jingsngewkmen kaba khraw halor ka jingshah thung ka Kong Idashisha Nongrang, IPS kaba dei ka kynthei kaba nyngkong eh ban long kum ka Director General of Police ka Sorkar Jylla katkum ka jingmih ha ki lad pathai khubor ha ka 12 tarik u Jymmang, 2024.
Ka President Ka Lympung Ki Seng Kynthei, ka Kong T. Phanbuh ka la ong ba ka seng ka kwah ban pynpaw ka jingsngewnguh ïa ki bor kiba dei khmih na ka bynta kane ka kam namar ba lyngba ka jingthung ïa ka Kong Idashisha Nongrang ka pyni ba ki kynthei ki lah ban kit bad shaniah ba kin shim ïa ki jingkitkhlieh bad ki jingïaleh kiba man la ka sngi lada ailad ïa ki ba kin ïoh ïa kata ka lad kaba dei bad ka rynsan ba kin ïeng.
Shuh shuh ka seng ka da kyrkhu-kyrdoh bad kyrmen ruh ba ka Kong Idashisha Nongrang kan leh ïa kaba bha tam bad ba kan lah ban kiew shaphrang ha ki kam kiba ka leh baroh.
