Shillong, Jymmang 17
U Myntri Rangbah ka Jylla, u Conrad K. Sangma ha ka Sngi Thohdieng u la ïashim bynta ha ka jingïalang jong ki Deputy Commissioner bad Sub-Divisional Officer (Civil) kaba la long ha Shillong, ha ryngkat ka jingdonlang u Myntri Sorkar, u Bah Kyrmen Shylla.
Ka jingthmu jong katei ka jingïalang ka long ban pyntip sha ki ophisar halor ki sienjam bapher-bapher kumno ban ïaid shakhmat bad ki kam jong ka roi ka par lyngba ka ‘Data-driven Governance’.
Haba ai jingkren ha ka jingïalang, u Sangma u la kyntu ïa ki ophisar ka Jylla, distrik bad Sub-Division ban ïatreilang ha ka ban pyntikna ïa ka jingpyntreikam hok ïa ki prokram bad ki skhim. U la ban jur halor ka jingdonkam ban buh shuwa ïa ki paidbah hakhmat ha man la ka rai ba ki shim, ha kawei ka liang ka ban nang pyntyllun ïa ka jingkiew bad ka roi ka par jong ka Jylla.
“Ka jingïalang ka long kaba kongsan naba ki jingpynsngew ba ngi ïoh pdiang na ki DC bad SDO ki long kiba donkam ïa u paidbah babun balang,” la ong u Myntri Rangbah.
U la pynkynmaw biang ïa ka thong jong ka Jylla ban kynjoh ïa ka ïoh ka kot kaba 10 ‘billion dollar’ (US), kaba la pynïasoh sha 10 tylli ki lad jingmyntoi bad ka jingminot jong ka Sorkar. U la ban jur ba man la kito kiba don ka jingsngewkhia ki dei ban trei lang ban kynjoh ïa ka thong.
U la ïathuh ba ki jingkdew bapher-bapher jong ka jingkiew ha ka roi ka par ki la manbha ha kine ki 6 snem ba la dep.
“Ngi la lah ban leh bha ha ki skhim bapher-bapher ka Sorkar Pdeng bad Sorkar Jylla namar ka jingtrei hok ha ka ban pyntreikam ïa kine ki skhim ka la manbha lyngba ka jingïatreilang, jingpeitngor, jingminot bad jingkitkhlieh,” u la ong.
U Myntri Rangbah u la bthah ruh ïa ki DC bad SDO ban leit jngoh bad jurip na ka por sha ka por ïa ki skul, aspatal, PHC, CHC bad kiwei-kiwei, bad ban pyntip sha ka Sorkar lyngba ki kor bapher-bapher ka juk stad teknoliji. Kane kan ïarap ïa ki nongthaw aiñ ban shim rai hadien ba la ïoh lut ïa ki jingtip baroh.
Shuh shuh u la bynrap, “Ka jingwanrah jingkylla ka dei kawei na ki ajenda ba hakhmat eh jong ngi. Ngi kwah wanrah jingkylla ha ka liang ka jingshakri ïa ki paidbah,” u la ong, da kaba kyntu ïa ki ophisar ban trei kum ka kynhun bad ban buh hakhmat ïa ka thong ban shakri ïa ki paidbah.
Ha kane ka jingïalang, u Commissioner & Secretary, Dr. Vijay Kumar u la batai bniah halor ki sienjam lyngba ki kor ka juk stad teknoliji na bynta ka synshar-khaddar ba kynthup ïa ka ‘CM-Connect’ bad ‘DC-Connect’.
