Shillong, Jymmang:
Ka jingslem ban shna ïa ka nala ban ïaid naduh Lachumiere ha syndah ka skul All Saints shaduh ka Tirot Sing Indoor Stadium barim ka um ka la tuid beit-beit sha surok bad sahkut hapdeng surok hakhmat shlem treikam DIPR kat haduh ba ki scooty, ki kali rit ki la ïaid da ka jingsyier namar ka um ka la poi mar shiteng.
Kane ka jingdap um ka dei ka jingshlei um na ka jingther u ‘lapbah ha ka Sngi Palei ha por 1 baje nohphai sngi kaba bteng haduh 4 baje janmiet.
Ka jingshlei ka um na nala ba dang shna ka la poi ruh sha phyllaw ka shlem treikam Forest and Environment Division Forest Officer Silviculture haduh ba ki nongtrei kim lait shuh ban mih ha baranda.
La ïohi ba ki kali kiba thmu ban leit sha Dhankheti ki la hap ban phai noh bad don ruh ki kali kiba sahkut hapdeng surok namar kim ïaid shuh ba la rung um.
Ka jingther u ‘lapbah ha Shillong ka la pynshlei ïa ki wahduid bad sahkut ki nala kiba dei ban tuid sha Wahumkhrah bad Umshyrpi.
Shuh shuh la ïohi ba ki paidbah ki hap law noh ïa ki juti bad ïaid da kjat suda haba ka um ka la kylla pung hapdeng surok.
