Shillong, Jymmang:
Ka khubor na ki pulit ba la ïoh lum ha ka Sngi Palei ka ïathuh ba u Bhupender Singh na ka 193rd Battalion jong ki shipai BSF ha Bordup Border Outpost, East Khasi Hills, u la ujor ba ha ka 12 tarik Jymmang ha ka por kumba 10:30 mynmiet, ki BSF ki la ïohi ïa ka jingïaid jong ki briew ba la suba ba ki dei kiba donkti ha ki kam khaïi be-aiñ kiba don kumba 60 haduh 70 ngut eiei.
Utei u nongujor u la ong ba ha ka por ba ki BSF ki la ïohi ïa ki, la shem ba ki dang ïa donkti ban pynpoi be-aiñ ïa ki mar ki mata sha shiliang khappud hadien ba ki la pynjulor ïa ki nar rod ba la buh ha ka muri (culvert).
Nalorkata la ong ba haba ki shipai BSF ki la leit ban khanglad ïa ki, kitei ki briew ki la kawang da ki maw ïa ki BSF.
Kham hadien, ynda la pynlong ïa ka jingkhynra ha katei ka jaka, la lap ïa ki jaiñ ki nep kiba shongdor kumba T.7,06,200.
