Shillong, Jymmang 17
Uwei u rangbah Khasi u la shah lute haduh T. 8.5 lak ha ar ngut ki runar ki bym lah ban ithuh bad ki la shah la dat ruh ïa u katba kawei ka nongshong shnong na South West Khasi Hills ka la duh ei T. 49,999 hadien ba ka ïoh ïa kawei ka jingthoh ha ka ‘Mobile Phone’ jong ka.
Katkum ka khubor ba la ïohlum na ki pulit, la ong ba utei u rangbah u la ujor ba ha ka 15 tarik Jymmang, ar ngut ki runar kiba la shong da ka ar shaka ki la shoh la dat ïa u ha Boucher Road, Shillong, bad ki la knieh jubor ruh ïa ka pla ka jong u kaba don T. 8.5 lak ka pisa.
Na ka liang ki pulit, ki dang pynlong ïa ka jingtohkit ban lap ïa kitei ar ngut ki runar kiba la shoh bad lute na utei u rangbah.
Ha kawei pat ka jingjia, kawei ka nongshong shnong na South West Khasi Hills ka la ujor ba ha ka 6 tarik Jymmang ha ka por kumba 12:39 mynsngi, ka la ïoh ïa kawei ka ‘message’ ha ka ‘Mobile Phone’ jong ka ha kaba la phah lang ïa ka ‘Link’ bad u ‘OTP (One-Time Password) ha kaba ïadei bad kata ka ‘SBI Reward Point’.
Hadien ba katei ka nongshong shnong ka la bud katkum ka jingbthah kaba don ha kata ka ‘message’, ka la shem ba ka la duh ei `49,999 na ka jaka kynshew pisa jong ka ha Bank (Bank Account).
Shuh shuh ha kawei pat ka jingjia, ki pulit ki la ong ba ka Kong Phaidalin Kharlyngïong ka la ujor ba ha ka 5 tarik Jymmang ha ka por kumba 2 baje mynstep, uwei u briew ba la tip kyrteng kum u E Ïawphniaw, u la leit prong ha ka dukan jong ka kaba don ha Mawthawpdah, South West Khasi Hills, bad u la ïoh tuh ruh na kane ka dukan. Ym tang katta, ka Kong Phaidalin ka la kynnoh ruh ba une u juh u briew u la tuh kumba T. 3,000 eiei sa na kawei pat ka dukan kaba dei jong ka Kong Magdalina Shangpliang.
Sa ha kawei pat ka jingjia ha ka 15 tarik Jymmang, ki pulit ka Jengjal, West Garo Hills, ki la ïoh bat ïa kawei ka trok (AS-25EC-4876) kaba la ñiah da u Giyasuddin Ali, bad kane ka trok ka la kit ïa ki jaiñ kup thiah kiba shongdor kumba `7 lak eiei bad ka jingthmu ka long ban pynpoi ha uwei u briew ïa uba la tip kyrteng kum u Anand Kr Saha na Malikona, Baghmara (South Garo Hills).
Ïa kitei ki jaiñ kup thiah, ki pulit ki la ong, ba la dei ban aiti sha u Saha ha kawei ka jaka kaba hap hapoh ka thanat Jengjal. Hynrei, ha ka por ba ki pulit ki dang khynra ïa katei ka trok, ki la lap ba ki ‘e-way bill’ kim long satia kiba lah ban shaniah. Namarkata, ki pulit ki la kem ïa utei u nongñiah ïa ka trok tangba u la pyrshang ban phet. Hynrei ki pulit ki la beh thong ïa u bad ki la ïoh ban kem bad u la mynsaw ruh malu-mala.
Shuh shuh ki pulit ki la ïathuh ba uwei u briew ba la tip kyrteng kum u Jonathan A Sangma u la ujor ba ha ka 15 tarik Jymmang ha ka por kumba 9 baje mynmiet, uwei u briew uba la pynithuh ïalade kum u Aloysious, uba la kam ba u dei u Nokma jong ka shnong Gonglanggre, West Garo Hills, u la shoh la dat ïa u (Jonathan), uwei u nongñiah trok bad uwei u nongïarap ha ka Weighbridge jong ka tnat Transport kaba don ha Gonglanggre.
Sa ha kawei pat ka jingjia, u Rangbah Shnong ka Shyrmang, West Jaiñtia Hills, u la ujor ba ha ka 15 tarik Jymmang ha ka por kumba 6 baje janmiet, ki ‘volunteer’ jong ka shnong ki la ïoh bat ïa uwei u briew ba la tip kyrteng kum u Kmaibok Kynjing na ka khlaw (Wild Life Sanctuary) kaba don ha shnong, bad ki la ïoh kurup ruh ïa ki tiar siat na u.
